Taǵy da, taǵy, taǵy da,
Taǵy da syna, bilgishim.
Kirip ap meniń janyma,
Kir izdep taǵy júrmisiń?!
Bir jyrym - meniń bir balam,
Mezgilsiz shala týmaǵan.
Merzimi jetken shaǵynda,
Shyǵam dep syrtqa týlaǵan.
Mezgilsiz óleń týmaıdy,
Kóńilsiz bolsa, kim bilsin.
Sybyzǵy desem qýraıdy,
Ony da syna, bilgishim.
Domalaq jerdiń ústinde,
Domalap bara jatyrmyn.
Muhıtqa súńgip tústim de,
Aspanǵa bir-aq atyldym.
Aıǵa ushyp bara jatyrmyn,
Muny da syna, aqyldym,
Áıteýir meni qatyrǵyn
Týyn jyq tuǵyr aqynnyń!!!
Sahara myna jerime,
Saǵymnan kóılek kıgizdim.
Sandalyp júrgen bórige,
Sary atanymdy búrgizdim.
Juldyzyn mynaý aspannyń,
Jerde turyp-aq basqardym.
Mamyq ettim de tastardy,
Taýymdy basqa jastandym.
Jotama qala ornatyp,
Boıyma syımaı júr kúshim.
...Tuǵyr aqyndy sorlatyp,
Muny da syna, bilgishim.
Osylaı ómir súremin,
Osylaı júrip kún keshem!
Dúnıeniń myna júregin,
Aqynnan sura, bilmeseń!!!
Jyrym kóp áli meniń jazylmaǵan.
Kenim kóp áli meniń qazylmaǵan.
Qaldyryp bolar-bolmas qazynamdy,
Nelikten bir kúni men jazym bolam?!
Qýalap tirshiliktiń kóbelegin,
Qap qoıdy qapelimde kóp óleńim.
Jalǵyzym, janym meniń - jyrym meniń,
Qaldyryp seni artyma nege ólemin.
Jazaıyn, jalyqpaıyn, jasyrmaıyn,
Qashan qalǵyp ketkenshe basylmaıyn.
Aıa dep ajalǵa men bas urmaıyn,
Shoq shaınap, ot búrikken Qasymdaıyn

---