InfoHub Logo

Án  men jyrdyń besigi sanalatyn kıeli Jańaarqa óńiriniń  daraboz daryndar men tolaǵaı talanttardyń  basyn qosqan mereıli meken ekeni barshaǵa málim.    Jańaarqa- bul Saryarqanyń sańlaǵy bolǵan Sákendeı seriniń, odan keıingi Arqanyń aıaýly ánshileri  I.Omarov, Q.Baıbosynovtardyń, qazaqtyń dara perzentteri, kórnekti ǵalymdar S.Qırabaev pen  A.Seıdimbektiń, elim dep eljiregen dara tulǵa B.Tileýhanovtyń, alashtyń arda aqyny Ǵ. Jaılybaıdyń, sol tárizdi júzdegen tóltýma tulǵalardyń týǵan jeri. 

Kelgende qoldaıtyn ýaqyty,
Rýhtar – bul jerdiń ıesi.
Ulynyń bar bilem baqyty –
Qumynyń bar bilem kıesi,- dep, «Alash» ádebı syılyǵynyń laýreaty, aqyn Ǵ.Jaılybaı jyrlaǵandaı, osyndaı  qasterli de qasıetti ólkeden nár alǵan ul- qyzdardyń da óner –bilimnen alshaq bolýy, áste, múmkin emes. Mine, osynaý dana da  dara jandardyń izi qalǵan Jańaarqanyń túlegi retinde, men de, babalar salǵan sara jolmen júrip, eline paıdasy tıetin sanaly, bilimdi azamat bolýdy   perzenttik  boryshym dep sanaımyn. Al, osy  ıgi maqsat jolyndaǵy alǵashqy qadamym arman qala Almatydaǵy Qazaq Ulttyq Ýnıversıtetine oqýǵa túsýim dep bilemin. Sanjyldyq tarıhy bar, halqymyzdyń qasterli tulǵalary bilim alǵan  qasıetti qarashańyraq - Ál- Farabı atyndaǵy Qazaq Ulttyq Ýnıversıtetiniń stýdenti atanýym men úshin zor jetistik ári úlken abyroı  boldy. Bul oqý ornyna túsýdi oqýshy kúnimnen armandaǵan edim.  Sol sebepti de ózim bilim alyp jatqan osynaý  qutty meken  jaıynda qysqasha aıtyp ótýdi jón kórdim. 

Men sıaqty  myńdaǵan jastardyń armanyna aınalǵan bul oqý orny- búgingi tańda Qazaqstandaǵy ǵana emes, sonymen birge, Ortalyq Azıadaǵy jetekshi ýnıversıtetterdiń biri de biregeıi. Qazaq  Ulttyq Ýnıversıteti- respýblıkadaǵy  barlyq joǵary bilim berý júıesiniń tiregi jáne bilikti  mamandar men bilimdi stýdentterdiń ordasy. 1934 jyly irgesi qalanǵan bilim ordasy kúnnen- kúnge álemdik bilim berý júıesinde ózindik ornyn aıqyndap keledi. Onyń  dáleli retinde,  belgili QS  World University Ranking   halyqaralyq reıtıń agenttiginiń 2017 jyly jarıalaǵan zertteý qorytyndysyna sáıkes, ál-Farabı atyndaǵy Qazaq Ulttyq Ýnıversıteti álemdegi úzdik 800 ýnıversıtet arasynda 236-oryndy ıemdenip, eń úzdik 250 ýnıversıtet qatarynan taǵy da kórindi. 

Jalpy damý baǵyty halyqaralyq bilim berý standarty boıynsha qabyldanǵan  ýnıversıtet bilikti mamandardy daıarlaýǵa, óndiriske engiziletin irgeli jáne qoldanbaly zertteýlerdi damytýǵa baǵyttalǵan keń kólemdegi ǵylym, bilim, rýhanı-tárbıelilik, ınovasıalyq jáne óndirýshi negizine ıe. Bul oqý orny erteńgi el tiregi jas urpaqty maıtalman maman retinde ǵana emes, qoǵamda ózindik ornyn taba biletin sanaly azamat etip qalyptastyrýda da  aıryqsha ról atqaryp otyr. Ýnıversıtette jastardyń jarqyn bolashaǵy úshin barlyq jaǵdaı jasalǵan. Atap aıtsaq, elimizdegi  eń iri kitaphanalardyń biri- Ál-Farabı kitaphanasy, Internet ortalyǵy, «Keremet» stýdentterge qyzmet kórsetý ortalyǵy, Ó.Joldasbekov atyndaǵy stýdentter saraıy – bári de bilim alýshy stýdentterdiń ıgiligi úshin erekshe oryndar bolyp sanalady. Sonymen birge, ýnıversıtet quramynda 20 ǵylymı-zertteý ınstıtýty, 14 fakúltettiń quramyndaǵy 98 kafedra jáne Tehnopark jumys isteıdi. Osynyń bári oqý ordasynyń mereıin odan ári  asqaqtata túsetini sózsiz. 

Basqa fakúltetterdi bylaı qoıǵanda, ózim oqyp  jatqan fılologıa jáne álem tilderi fakúltetiniń ózinde halqymyzdyń qanshama zıalylary, aqyn- jazýshylar, kórnekti memleket qaıratkerleri bilim alǵan.  Sonyń ishinde, Zeınolla Qabdolov, Ábish Kekilbaev, Muhtar Maǵaýın, Dýlat Isabekov, Qadyr Myrza Áli, Tumanbaı Moldaǵalıev, Júrsin Erman, Oljas Súleımenov  sekildi  dara tulǵalardy aıryqsha atap ótken jón.   

Bir sózben aıtqanda, osynda bilim alyp jatqan barsha jastardyń  jarqyn  bolashaǵyna  jol siltegen QazUÝ-dyń stýdenti ekenimdi aıryqsha maqtan tutamyn. Bul maqtanyshymdy ári oǵan degen  qurmetimdi  ózimniń shaǵyn ǵana óleń shýmaqtarymmen jetkizsem deımin.

Qut meken jalyndaǵan jastar úshin,
Bilim menen ǵylymnyń asqarysyń
Jol salǵan alystaǵy armandarǵa 
Sen meniń baqytymnyń bastaýysyń!

Uıańnan ushyrdyń ǵoı san darany
Ózińsiń talaılardyń arman-áni
Qazaqtyń qasıetti shańyraǵy
Álemge keter atyń samǵap áli

S.Igilik, Ál- Farabı atyndaǵy QazUÝ

Fılologıa jáne álem tilderi fakúltetiniń

4-kýrs stýdenti  Ospanova G, Ál- Farabı atyndaǵy QazUÝ aǵa oqytýshysy

---