InfoHub Logo

JOO úzdik oqytýshysy – 2020» baıqaýynyń jeńimpazdary marapattaldy.

Elimizdiń 46 joǵary oqý ornynan 150 adam «Joǵary oqý ornynyń úzdik oqytýshysy» ataǵyna ıe boldy. Olardyń árqaısysy 5 834 000 teńge (2000 AEK) kóleminde grant jeńip aldy.

Úmitkerlerdi irikteý jáne qujattardy tekserý rásimi alǵash ret aqparattyq júıeniń kómegimen onlaın formatta ótkizildi. Baıqaýǵa qatysýshylardyń qyzmeti oqytý sapasy men ǵylymı-zertteý jetistikteri boıynsha baǵalandy. Baıqaý nátıjeleri mınıstrliktiń saıtyna ornalastyryldy.

Respýblıkalyq sarapshylar toby árbir qujattyń sáıkestigin muqıat tekserdi. Sondaı-aq komısıa quramyna QR BǴM «Adal Bilim» sybaılas jemqorlyqqa qarsy is-qımyl jónindegi jobalyq keńsesiniń ókilderi, ǵalymdar men oqytýshylar, sonyń ishinde «Joǵary oqý ornynyń úzdik oqytýshysy» baıqaýynyń ótken jyldardaǵy jeńimpazdary kirdi.

Mınıstr bilim jáne ǵylym júıesi úshin mundaı baıqaýlardyń ashyq túrde ótýi mańyzdy ekendigin erekshe atap ótti.

«Pandemıa kezinde elimizdiń joǵary bilim berý júıesi mańyzdy synaqtan ótip, JOO-lardyń jumysy jaqsy deńgeıde uıymdastyryldy. Osy rette syn-qaterlerdi múmkindik retinde qabyldaýǵa tıispiz. Qandaı da bir qıyndyqtar men qolaısyzdyqqa qaramastan, qazaqstandyq oqytýshylar bul jaǵdaıǵa tez beıimdeldi. Búgingi tańda bizdiń aldymyzda oqytýshynyń bedelin arttyrý, eńbek júktemesin azaıtý, eńbekaqyny kóbeıtý, oqytýshylardy ózine tán emes fýnksıalarǵa tartýǵa jol bermeý boıynsha jáne elimizdiń Prezıdenti Qasym-Jomart Toqaev aıqyndaǵan basqa da birqatar mańyzdy mindet tur», – dedi mınıstr Ashat Aımaǵambetov.

Konkýrsqa respýblıkanyń 73 joǵary oqý ornynan 623 úmitker qatysty.

---