InfoHub Logo

Bilimdiler

Joqqa bárin shyǵarmaı burynǵynyń
Jańalyǵyn ap keldi búgingi kún.
Sony ıgerer ul - qyzǵa dana qazaq
Kúni jaryq dep ketken bilimdiniń.

Bilim joldan izdegen tabady asyl
Dedi de ustaz izdendi jańa tásil.
Ustaz - sózge nemketti shákirtterin
Keshire almaı tur búgin jańa ǵasyr.

Talap qylǵan júırik tek tosylmady,
Tústi ilimniń keýdege asyl dáni.
Sol jolmenen lek bolyp shákirt keledi
Bilimdiniń sapyna qosylǵaly.

Deıdi olardy qazir - aq bilimdiler,
Sarbazdary dáýirdiń tilin biler.
Sardarlary kósh bastar pedagogter
Úmit kútip otyrǵan búgingi el.

Shákirt keledi kórsetip tanym qylyq,
Tańǵaldyryp, tamsantyp bárin de uǵyp.
Babasyna bas ıgen jarty álemdi
Almaq olar bilimmen baǵyndyryp.

Babalary taý basyp, attap tasyn
Qamshysymen qaqqan edi jat qaqpasyn.
Sol babanyń urpaǵy ózgelerdi
Bilim jolda bilip tur attatpasyn.

Shákirt keledi bıikteý talǵamdary,
Jańa dúnıe, jańalyq qoldanǵany.
Bilimdiler qosyny lek bop keledi,
Pedagogtar qaýymy sardarlary.

Zerde de bar, oı da bar qarasynda,
Shákirt keledi, olardy balasynba.
"Bir qudaıǵa sıynyp oqy" degen
Uly ustazdyń sózderi sanasynda.

Erlik jolda jasaǵan ushqyr qadam
Babasy da sıynbaı is qylmaǵan.
Keledi áne solardyń urpaqtary
Bilim qýyp janary ushqyndaǵan.

Osy jolǵa qaratyp júzin bári,
Lek keledi, qatary buzylmady.
Alǵa umtylǵan kishkentaı bilimdini
Bastap keledi pedagog ujymdary.

Avtory:
Ǵabıden QOJAHMET,
Qyzylorda qalasy