InfoHub Logo

Ál-Farabı atyndaǵy Qazaq ulttyq ýnıversıteti elimizdiń eń tanymal, bilimi joǵary, ári eń kóne ýnıversıtetteriniń biri ekenin bárimiz bilemiz. QS World University 2021 boıynsha QazUÝ álemniń eń myqty 200 ýnıversıtetiniń qataryna engen alǵashqy qazaqstandyq joǵary oqý orny boldy. Bul tek bilim ordasy úshin ǵana emes, sonymen qatar Qazaqstan úshin de úlken jetistik.

Qazaq Ulttyq ýnıversıteti Fılosofıa jáne saıasattaný fakúlteti ár aımaqtyń stýdentterin, magıstranttar men doktoranttardy baılanystyryp qana qoımaı, shetelden kelgen, atap aıtqanda Aýǵanstan, Qytaı Halyq Respýblıkasy, Túrkmenstan jáne ózge de elderden kelgen stýdentterdi oqytýda.

«Joǵary oqý ornynyń úzdik oqytýshysy 2020»  nomınasıasyn fakúltetimizdiń bedeldi ári bilikti oqytýshysy, tarıh ǵylymdarynyń kandıdaty Rahımbekova Baqyt Qýanyshbekqyzy jeńip aldy. Al bıyl 2021 jyly QR Bilim jáne ǵylym mınıstrligi «Qazaqstan Respýblıkasynyń ǵylymyn damytýdaǵy qyzmeti úshin»  tarıh ǵylymdarynyń doktory, profesor Hafızova Sh.S., fılosofıa ǵylymdarynyń doktory, profesor Abdıgalıeva G.K., LLM, zań ǵylymdarynyń kandıdaty (halyqaralyq quqyq) Kaýkenov A.S. alsa, «Qazaqstan Respýblıkasy Bilim berý isiniń qurmetti qyzmetkeri» atty marapatqa áleýmettaný ǵylymdarynyń kandıdaty Ileýova G.T., saıasattaný ǵylymdarynyń doktory Musataev S.Sh., jáne saıasattaný ǵylymdarynyń doktory, profesor Nasımova G.Ó. ıe boldy.

Sonymen qatar álemge áıgili Konrad Adenaýer atyndaǵy qordyń stıpendıasy jyl saıyn eń úzdik stýdentterge beriledi. 2020 jyly bul qordan 37 stıpendıa bólinip, sonyń   4-in QazUÝ stýdentteri qanjyǵasyna baılady, onyń 2-i stıpendıasyn Fılosofıa jáne saıasattaný fakúltetiniń magıstranty men doktoranty utyp aldy. Bizdiń fakúltettiń stýdentteri men jas zertteýshileri Germanıanyń Frıdrıh Ebert qorynyń qoldaýymen kezdesýler, onlaın/oflaın konferensıalar ótkizedi, sonymen qatar jas ǵalymdarǵa qarjylaı ta kómek beriledi.

Qazaqstan Respýblıkasynyń Bilim jáne ǵylym mınıstrligi jyl saıyn uıymdastyratyn «Stýdentter/magıstranttardyń ǵylymı-zertteý jumysy» atty konkýrsynan  2020 jyly magıstrantymyz 1-shi oryndy ıelendi.

 «Saıasattaný» mamandyǵy boıynsha stýdentterdiń Respýblıkalyq olımpıadasy jyl saıyn elimizdiń úzdik JOO arasynda ótedi. Bizdiń fakúltettiń stýdentteri qatarynan 8 ret birinshi oryndy ıelenip, olımpıada ótkizý quqyǵyna ıe bolýda. Bul jetistik bizdiń fakúltetimizdiń birden-bir maqtanyshy bolyp tabylady. QazUÝ Fılosofıa jáne saıasattaný fakúlteti álemniń túrli myqty ýnıversıtetteri jáne zertteý ortalyqtarymen tyǵyz ǵylymı yntymaqtastyq baılanysyn quryp keledi. Erazmýs Mýndýs, DAAD jáne ózge de stıpendıa/granttardyń arqasynda stýdentterimiz shet eldiń ýnıversıtetterinde bilim alýda. Fakúltetimizdiń jetistikteri óte kóp, muǵalimderimiz de Bolashaq baǵdarlamasy arqyly jyl saıyn shetelde taǵylymdamalardan ótedi. Qazirgi tańda open.kaznu onlaın platformasy belsendi jumys jasap jatyr, psıhologıadan bastap saıasattaný, fılosofıa, áleýmettaný, dintaný ǵylymdaryna arnalǵan túrli onlaın kýrstardy tegin kórýge bolady.

ál-Farabı atyndaǵy Qazaq ulttyq ýnıversıtet elimizdiń eń myqty ýnıversıtetiniń biri bolsa, saıasattaný mamandyǵy ýnıversıtetimizdiń eń myqty mamandyqtarynyń biri bolyp tabylady. Sebebi, myqty ustazdar men profesorlardyń quramy, stýdentterge degen erekeshe qarym - qatynas jáne bilim berýdiń ınovasıalyq ádis - tásilderi, stýdentterge, magıstranttarǵa, jas ǵalymdarǵa degen qoldaý erekshe. Sonymen qatar, kafedra, fakúltet jáne ýnıversıtetimizdiń taǵy bir ereksheligi - bul óte qanyq stýdenttik ómir. Ár stýdent/magıstrant ózine qyzyqty, ári júregine jaqyn uıymdar men birlestikterge qatysyp ózin tanyta alatyny sózsiz!

---