InfoHub Logo

Kóptegen sheteldik joǵarǵy oqý oryndarynda túlekterge dıplom tabystaý saltanatyna quttyqtaý, ári olardy jigerlendirý úshin ataqty adamdardy shaqyratyn dástúr bar. Kóbine asa tanymal adamdar túlekterge ózderiniń sátsizdikteri týraly áńgimeleıdi — óıtkeni keshegi stýdentter bárinen buryn sátsizdikten kóbirek qorqatyn bolar. Djoan Roýlıng, Stıv Djobs jáne Stıven Spılberg pen Djım Kerrı sátsizdikterden nege qoryqpaý kerektigin túsindiredi.  

Djoan Roýlıng, jazýshy

2016 jyly Djoan Roýlıng Gollıvýdtyń "The Hollywood Reporter" jýrnalynyń nusqasy boıynsha álemdegi eń yqpaldy 25 avtorlardyń kóshin bastady. Al odan jıyrma jyl buryn, 1997 jyly Bloomsbury baspasy Garrı Potter týraly alǵashqy kitabyn jarıalaǵanǵa deıin, ol áleýmettik járdemaqyǵa kúnin kórgen, turaqty tabysy joq, eshkimge belgisiz jalǵyzbasty ana edi.

«Oqý bitirgennen soń, araǵa jeti jyl ótkende men barlyq turǵyda úlken sátsizdikke ushyradym. Nekem buzyldy, balamen jalǵyz, jumyssyz ári aqshasyz qaldym. Men sátsizdikti keremet degim kelip turǵan joq. Meniń ómirimniń dál sol sáti men úshin eń qıyn kezeń boldy, bolashaqta ómirim qazir gazetterde jazylyp jatqandaı sońy baqytqa ulasatyn ertegige aınalady dep oılamadym. Biraq dál osy sátsizdik meni qutqardy — meniń basty qorqynyshym oryndaldy, soǵan qaramastan eń bastysy tiri edim, meniń súıikti qyzym, eski baspa mashınam jáne qıalda kóptegen ıdeıalarym boldy. Eger basqa salada jetistikke jetý múmkindigi buıyrǵanda, men shyn máninde jaqsy kóretin isimmen aınalysýǵa múmkin batyldyǵym jetpes edi.

Sátsizdikterdi aınalyp ótý múmkin emes, tek asqan saqtyqpen ǵana ómir súrgen bolsańyz ǵana sátsizdikke kezikpeıtin shyǵarsyz, degenmen, bundaı ómirdi «ómir» dep ataýǵa kelmeıtin shyǵar. Biraq bul jaǵdaıda siz sátsizdiktiń naǵyz ózine ushyraısyz».
   
Garvard túlekteri aldyndaǵy sózderi, 2008     

Stıven Spılberg, kınorejısór

Tarıhtaǵy eń tabysty rejıserlerdiń biri tek 2002 jyly 55 jasynda joǵary bilim týraly dıplomyn alǵan. Jas kezinde ol kalıfornıa kınomektebine eki márte túsýge tyrysqan, biraq ony «darynsyz» dep tanyp, mektepke qabyldamaǵan. Sodan keıin ol tehnıkalyq kolejge túsken, alaıda kóp uzamaı Universal Studios-taǵy «armandaǵan jumysyna» ornalasý úshin kolejdi tastap ketken. Bes jyldan keıin  Spılbergti ataqty qylǵan «Jaws» trılleri jaryq kórdi.

«Men kolejden ketip qaldym, óıtkeni senderdiń keıbireýiń sıaqty men de ne qalaıtynymdy anyq bildim. Bálkim, sender qazir jazýshy-úmorıst emes, doktor bolǵylaryń keletinin ata-anańyzǵa qalaı aıtýdy oılanyp otyrǵan shyǵarsyńdar. Men óz ata-anama eger kınoda jolym bolmasa, ýnıversıtetke qaıta oralamyn dep aıttym. Biraq kınoda jolym boldy.

Bizdiń ómirimizdiń alǵashqy 25 jylynda bizdi bóten daýystardy tyńdaýǵa úıretedi. Ata-analar men oqytýshylar bizdiń sanamyzdy danalyq sózdermen, paıdaly aqparatpen toltyrady, sodan keıin olardyń ornyn myna dúnıeniń shyn máninde qandaı ekenin úıretetin bastyqtar basady. Tipti biz: «Men álemge múldem basqasha qaraımyn» dep ishteı oılap turǵanymyzben, biz úshin olarmen kelisip, jaı ǵana bas ızeý áldeqaıda ońaı bolatyny ras.

1980-shi jylǵa deıin túsirilgen fılmder kóbinese shyndyqtan alshaq boldy. Men bir kópirshiktiń ishinde ómir súrgendeı boldym, sebebi maǵan joǵarǵy bilim jetispedi, meniń álemge degen kózqarasym ómirlik tájirıbege emes, óz basymdaǵy oılarmen ǵana shekteldi. Sodan keıin men «Lalagúl jazyǵynyń gúlderi» fılmin túsirdim. Bul oqıǵa tereń maǵynaǵa, tereń shyndyqqa toly boldy, mysaly, fılmde Shag Eıverı: «Álemdeginiń bári súıikti bolǵysy keledi» deıdi. Bul fılmdi túsire otyryp, kıno meniń mısıam bolýy múmkin ekendigin túsindim. Kez kelgen adam osyny sezinedi dep úmittenemin».

Garvard ýnıversıtetiniń túlekteriniń aldynda sóıleýi, 2016 jyl

Stıv Djobs, kásipker

1976 jyly 20 jasar Stıv Djobs Stıv Voznákpen birge ata-anasynyń garajynda Apple-dy qurdy. 10 jyldyń ishinde kásiporyn alty myńnan astam adam jumys isteıtin, quny eki mıllıard dollar bolatyn iri kompanıaǵa aınaldy. Olardyń arasynda Djobstyń shaqyrýy boıynsha Apple-di basqarǵan marketolog Djon Skallı da boldy. Ýaqyt óte kele olardyń bolashaqqa degen kózqarastary ekige aıyryldy, dırektorlar keńesi Skallıdi qoldady da, Stıv Djobsqa Apple-dan ketýge týra keldi.

«30 jasymda meni ózim qurǵan kompanıadan úlken daýmen jumystan bosatty. Sanaly ǵumyrymdy arnaǵan barlyq nárseden bir sátte  aıyrylyp, ózimdi jabyrqaýly sezindim. Sol kezde meniń Apple-dan ketkenim — men úshin eń qaıyrly is bolǵanyn tipti bilgen joqpyn.  Tabystyń qıyn joly jeńildikpen almasty, men qaıta týylǵan kúıde boldym. Osy sezimmen meniń ómirimdegi shyǵarmashylyqqa toly  kezeńderdiń biri bastaldy. Keıingi bes jyl ishinde men NeXT jáne Pixar–dy qurdym jáne sulý áıelge ǵashyq boldym, keıin ol meniń jarym boldy. Eger men Apple-dan ketpegenimde, munyń biri de bolmaıtynyna senimdimin. Dáriniń dámi sumdyq boldy, biraq naýqasqa (ózin aıtyp otyr) qatty qajet bolǵan eken.

Men óz isimdi erekshe jaqsy kórgendikten ǵana keri sheginbesten, alǵa jyljyǵanyma senimdimin. Eger siz ózińizge unaıtyn nárseni áli tappaǵan bolsańyz — izdeýdi jalǵastyra berińiz».

Stendford ýnıversıtetiniń túlekteriniń aldynda sóz sóıleýi, 2005

Djım Kerrı, aktór

Djım Kerrı alǵash ret 15 jasynda komedıalyq nómirimen sahnaǵa shyqqan edi — onyń debúti sátsiz boldy. Kóptegen sátsiz kastıngterden keıin, 23 jasar Kerrı kınodaǵy óziniń alǵashqy, basty rólin somdaǵan "Once Bitten" (1985) fılmin de  kópshilik salqyn qabyldady. Tek 31 jasynda  Ace Ventura: Pet Detective» atty az búdjettik fılminen keıin ǵana onyń ataǵy shyǵa bastady. Fılmge Ventýranyń obrazy men senarıdi Djımniń ózi oılap tapqan. Bul fılm úshin Kerrı eń nashar akterlik jumystarǵa beriletin syılyq «Golden Raspberry» nomınasıalandy, biraq kórermender arasynda fılm úlken tabysqa ıe boldy, al Eıs Ventýra áıgili komedıa keıipkerleriniń birine aınaldy. Kerrıdiń kelesi fılmderi — «The Mask», «Dumb and Dumber», «The Truman Show» kınematografıanyń klasıkasyna aınalǵan.

«Adamdardyń kóbi «senimdi» degen jeleýmen, qorqynysh jolyn tańdaıdy. Meniń ákem komık bolýdy armandaıtyn, tipti ol úshin onyń barlyq múmkindigi bolǵan. Biraq, qolynan keletinine senbedi, sondyqtan, esepshi bolyp jumys istep, jaıbaraqat «jaıly» oryndy tańdady. Men 12-ge tolǵanda ol jumystan aıyrylyp qaldy, saldarynan bizdiń otbasymyz qıyn kúnderdi bastan keshti. Osy  mysaldan túıgenim, unamsyz jumystan da sátsizdikke ushyraý múmkin eken, olaı bolsa nege janyń qalaıtyn iste baq synamasqa. Bul kúlkili nemese múldem múmkin emes sıaqty kórinýi múmkin, biz jaratqannan suraýǵa tipti tyryspaımyz da. Myna, men, ózińiz qalaǵanyńyzdy suraı alatynyńyzǵa barlyq múmkindigińiz baryna tiri dálel bola alamyn».

Maharıshı menejment ýnıversıtetiniń túlekteriniń aldynda sóıleýi, 2014

Oqýǵa keńes beremiz:

Kásip tańdaý

---