InfoHub Logo

Kishi júzdiń eli on eki atadan turady. Ony on eki ata Baıuly dep ataıdy. On eki ata rýly eldiń biri Esentemir rýynan quralǵan el. Esentemir rýynyń ishinde ataqty Bóken bı bolypty. El aýzyndaǵy áńgimege qaraǵanda, Bóken bı XVIII ǵasyrda qazirgi Gýrev oblysynyń jerinde ómir súrgen adam. Onyń sharýasy shaǵyn adam bolý kerek. Sharýasynyń shaǵyndyǵynan ba, álde kóńiliniń jaratqany ma, ómir boıy astyna mingeni
ógiz bolypty. Astyńyzǵa at nege minbeısiz degenderge, atqa minsem, kóńilim ósip takappar bolyp ketemin dep syltaý aıtatyn sekildi. Kók ógizdi minip búkil baıulyn aralaıdy, bılik aıtady. Kishi júzdiń elinde onyń aldyna shyqqan, sózine shek keltirgen eshkim bolmaıdy.

Bóken bı jaz aıynyń ishinde ógiz minip, el aralap júrgende, bir aýyldyń shetinde oınap júrgen bir top balaǵa kezdesedi. Ol Dattyń aýyly bolady. Balalar jolaýshy Bóken bıge sálem bermeıdi. Sonda Bóken bı turyp, balalarǵa syn taǵyp bylaı deıdi:

— Balalar, aman ba? Nege sálem bermeısińder, úlken kisige sálem berý jol emes pe? — dese, top balanyń ishinen bir bala turyp:

— Ata, bizderdiń bárimizdiń jasymyzdy qossa, biz sizden úlkenbiz, siz nege sálem bermedińiz? — depti. Ol bala Syrym eken. Bóken bı sózden qalady. Ózin jeńildim dep esepteıdi. Úndemeı, jaıymen ógizinen túsip, dáret etedi. Bóken bı dáret etip otyrǵanda, ógizi shybyndap, múıizin shaıqap júrip ketipti. Sol kezde Bóken bı otyryp: «Balalar, ana ógiz shybyndap júrip ketti ǵoı, ustańdarshy?!» — dep suraıdy. Bir bala ógizdi ustaıyn dep umtylsa, bala Syrym ony kidirtip jibermeıdi, ógiz shybyndap uzap ketedi.

Bóken bı turyp kelip, taǵy da syn taǵyp:

— Balalar! Ana ógizdi nege ustamadyńdar, uzap ketti ǵoı, — dese, Syrym turyp:

— Ata! Búkil on eki ata Baıulyna tilińizdi aldyrǵanda, astyńyzdaǵy minip júrgen jalǵyz ógizińizge til aldyra almaǵanyńyzǵa arlanyp ustamadyq, — depti. Bóken bı sózden jeńilgenin sezip úndemepti. Syrym bala kúninen sózge sheber, utyp sóıleıdi eken desedi. Ol aýyl Dattyń aýyly eken.

Oqýǵa keńes beremiz:

Jylqynyń torysy kóp pe, tóbeli kóp pe? (İ nusqa)

Syrymnyń Nuraly handy shabýy (İİ nusqa)

Baımaǵambet sultan men Syrym batyr

---