«Bolashaq» stıpendıasyna qujattar tapsyrý tártibi jeńildetildi - Ǵ. Nyǵymetov
«Bolashaq» stıpendıasyna qujattar tapsyrý tártibi jeńildetildi. Bul týraly búgin Ortalyq komýnıkasıalar qyzmetindegi brıfıńte QR Bilim jáne ǵylym mınıstrligi «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti.
Belgili bolǵandaı, bıyldan bastap halyqtyń qujattar daıyndaý shyǵystaryn ońtaılandyrý maqsatynda qujattar paketin tapsyrý talaptary jeńildetildi.
«Eger buǵan deıin usynylatyn barlyq qujattardy notarıaldy kýálandyrý qajet bolsa, qazir tek akademıalyq oqýǵa (shetelge) óz betimen túsken nemese «Bolashaq» aıasynda taǵylymdamadan ótýdi josparlarǵan úmitkerden shyqyrý qujatyn notarıaldy kýálandyrýdy suraımyz. Basqa qujattar, ıaǵnı dıplom, eńbek kitapshasy jáne ózge qujattardy notarıaldy túrde kýálandyrý kerek emes»,-dedi ol.
Ǵ. Nyǵymetovtiń aıtýynsha, aǵymdaǵy jyldan bastap talap etiletin kezeń úshin mindetti zeınetaqy jarnalary aýdarymdary týraly úzindi kóshirme usyný normasy engizildi.
«Bul degenimiz, osy jyldan sanattar boıynsha úmitkerlerde eki jyl jumys ótili bolýy kerek, sonymen qatar ol zeınetaqy aýdarymdaryn kórsetýi tıis», - dedi ol.
Qujattardy elektrondy úkimet veb-portaly, «Azamattar úshin úkimet» memlekettik korporasısy arqyly (burynǵy HQKO), sondaı-aq «Halyqaralyq baǵdarlamalar ortalyǵyna» baryp tapsyrýǵa bolady.
Onyń sózine qaraǵanda, elektrondy úkimet veb-portaly jáne halyqqa qyzmet kórsetý ortalyǵy arqyly qujattar tapsyrýshylardyń úlesi artyp keledi. 2015 jyly úmitkerlerdiń 40 paıyzy atalǵan eki tásildi paıdalanyp tapsyrǵan eken.
You Might Also Like
