InfoHub Logo

Esenǵalıeva Gúlmıra Edigeqyzy,

Atyraý oblysy, Atyraý qalasy,

A.S.Pýshkın atyndaǵy №20 mektep-lıseıiniń

bastaýysh synyp muǵalimi

Búgingi jastar – «Máńgilik eldiń» bolashaǵy. Qazaqstan Respýblıkasynyń Prezıdenti N.Á.Nazarbaev Qazaqstan halqyna joldaǵan joldaýynda basty maqsatymyz – Qazaqstannyń eń damyǵan 30 memlekettiń qataryna qosylýy, ol – «Máńgilik Qazaqstan» jobasy, el tarıhyndaǵy biz aıaq basatyn jańa dáýirdiń kemel kelbeti degen. Biz úlgili damýdyń ózindik modelin qalyptastyrdyq. Osy joldaýda «Máńgilik Qazaqstan» jobasynda Qazaqstan Respýblıkasynyń álem elderimen terezesi teń qatynas quryp, álem kartasynan oıyp turyp oryn alatyn salasynyń biri-ǵylym men bilimge óte úlken mán bergen. Al ony júzege asyratyn – ustanymy berik, bilimdi, jańa formattaǵy muǵalim.

Jańa formattaǵy muǵalim kim? Meniń oıymsha, qazirgi kezde barsha ustaz qaýymy jańa formatta bolýy mindetti. Sebebi myna jyldam damyp kele jatqan zamanda bilim alyp jatqan urpaqqa sapaly da sanaly, jańa formatta bilim berý úshin ózimiz de zaman talabyna saı barlyq jańa tehnologıalarmen qarýlanǵan bolýymyz kerek. Muǵalim mamandyǵyn tańdap, eńbek etkenime 9 jyl ótipti. Osy jyl aralyǵynda oqýshylarmen jumys jasaı otyryp, ózim de izdenip, bilimimdi shyńdap kelemin. Muǵalimniń jumysy kúrdeli ekendigi barshaǵa aıan. Búgingi sabaqty ótkizgen soń, erteńgi sabaqqa tyń oı, jańa ıdeıa, ózgeshe ádis-tásilmen kelý kerek. Qazirgi tańdaǵy ustazǵa degen talap jan-jaqtylyqty qajet etedi. Al osy talapqa saı bolyp, bilimdi de bilikti, jańa formattaǵy ustaz ataný úshin muǵalimder damylsyz bilimin shyńdap otyrýy qajet dep bilemin. Qazirgi kezdegi damyǵan eldiń qataryna qosylý úshin muǵalimderdiń Kembrıdj tásili boıynsha deńgeılik kýrstan ótýi basty nazarǵa alynyp otyr. Elbasymyzdyń saıasatynyń arqasynda qanshama muǵalim atalmysh kýrstan ótip, jańa formattaǵy muǵalim atanyp júrgen jaıy bar. Árıne ol ustazdardyń qatarynda men de júrmin. Meniń oqýdy aıaqtaǵanyma birshama ýaqyt ótpese de, dástúrli bilim berýdi dáripteı almas edim. Sebebi dástúrli bilim berý kezinde muǵalimder qaýymy oqýlyq ta, muǵalim de, oqýshy da bolatyn edi. Al endi syndarly oqytýda muǵalim tek baqylaýshy, baǵyttaýshy ǵana bolýy kerek. Árıne alǵashqyda qorqynysh boldy. Sebebi men tómen synyptarǵa ıaǵnı bastaýysh synyp oqýshylaryna sabaq beremin. Tilderi bala tilimen sóıleıtin bolǵandyqtan, ózderi bilim alýda, ózderin baǵalaýda, bir – birin oqytýda, toppen jumys jasatýda kútiletin nátıjege qol jetkize almaımyn dep oılaǵan edim. Biraq bizdiń damyp jatqan zamanda ósip kele jatqan urpaǵymyzdyń oı – sanasy týraly pikirimiz durys emes eken. Oqýshylardyń synı turǵydan oılaýynyń damyǵany sonshalyqty, ózimiz oılamaǵan nárselerdi aıtyp, kútilgen nátıjeden de joǵary nátıjege qol jetkizip júrdim. Qazirgi kezde syndarly oqytý boıynsha oqýshylarǵa bilim berip kelemin. Syndarly oqytýdyń oqýshy men muǵalimge bereri mol. Oqýshy óz oıyn erkin jetkizip, suraq quryp, sóıleý tili damyp, dostary arasyndaǵy yntymaqtastyǵy artsa, al muǵalim oqýshylarǵa kópirshe bolý arqyly tek baǵyt – baǵdar bere alady. Búgingi sabaǵyna keri baılanys alyp, erteńgi sabaqty durys, oqýshyǵa qyzyqty etip josparlaýǵa múmkindik jasalǵan. Syndarly oqytýdyń eń basty talaby: jospardy durys qurý, sabaqtyń maqsaty men kútiletin nátıjesin durys josparlaý. Jospar qurýda SMART júıesine súıene qurýǵa nazar aýdarylady. «Jańa formattaǵy muǵalim» naqty nársege qol jetkizý qajet, maqsatqa jettik dep aıta alatyndaı bolý kerek, qoljetimdi, ıaǵnı is-áreketke negizdelgen, sebebi naqtyly qandaı is – áreket ózimizge qajet beretinin túsinýimiz qajet. Sonymen qatar shyndyqqa negizdelgen, ıaǵnı qoıylǵan maqsatqa jete alatyndaı, naqtyly merzimi jáne maqsatty júzege asyratyn oryndy quraldary bolý kerek. Qurylǵan jospar naqtyly, qoljetimdi, shyndyqqa negizdelgen bolsa, sabaǵymyz da osy sarynda ótpek. Al sabaqtyń jemisti ótýi – árbir muǵalim úshin úlken jeńis dep bilemin.

«Máńgilik eldiń» bolashaq jastaryn tárbıeleýde jańa sarynda bilim berý árbir ustazdyń boryshy dep bilemin. Oqýshylarǵa sapaly da sanaly bilim berýde aldymyzǵa jan salmaı eńbek eteıik, qurmetti ustazdar qaýymy! Sebebi elimizdiń bolashaǵy osy jastardyń qolynda.

 

---