InfoHub Logo

Halyqaralyq baǵdarlamalar ortalyǵynyń prezıdenti Janbolat Meldeshov «Bolashaq» stıpendıasynyń aýyldy jerlerdegi úmitkerlerine arnalǵan jeńildikter týraly, sonymen qatar, qandaı túlekterdiń bes jyldyq óteýdi shamamen eki ese qysqarta alatyny týraly aıtty.

Bul týraly primeminister.kz saıty habarlaıdy.

Meldeshov óńirlerdiń gýmanıtarlyq, tehnıkalyq jáne basqarýshylyq áleýetin damytý jáne stıpendıa túlekterin óńirlerge tartýǵa yntalandyrý úshin «memlekettik qyzmetkerler» sanaty boıynsha stıpendıa ıegerleri úshin balamaly 3 jyldyq óteýdi usynbaq.

«Bolashaq» baǵdarlamasy boıynsha daıarlanǵan bilikti memlekettik menejerlerdiń basym kópshiligi ortalyqta jumys istegeıdi. Ortalyqtaǵy bes jyldyń ornyna óńirde úsh jyl óteý - «Bolashaq» baǵdarlamasy boıynsha bilim alǵan memlekettik qyzmetshilerdiń iri qalalardan óńirlerge aýysýyn qamtamasyz etedi dep esepteımiz», - dedi Janbolat Meldeshov BARCEF-2016 «Bolashaq» baǵdarlamasynyń İİİ halyqaralyq konferensıasynda.

HBO basshysy konferensıa qatysýshylaryna qazirgi ýaqytta baǵdarlamany iske asyrýdy taldaý negizinde ákimshilendirýdi odan ári jetildirý boıynsha birqatar tetikterdiń pysyqtalyp jatqanyn habarlady.

Osylaısha, aýyldyq mektepterdiń kadrlyq áleýetin kúsheıtý, sonymen qatar, óńirlerdegi stıpendıa ıegerleriniń sanyn ulǵaıtý maqsatynda, aýyldyq bilim berý uıymdarynyń pedagog kadrlary úshin jańa sanat engizý josparlanýda. Bul sanatqa aýylda eki jyl eńbek ótili bar úmitkerler jatqyzylady.

«Sonymen qosa, olardyń aǵylshyn tilin meńgerýine oraı, jeńildikter qarastyrylyp, olardyń aýyldyq mekteptegi mindetti jumys óteýiniń merzimin qysqartý máseleleri qarastyrylǵan. «Bolashaq» stıpendıasy kásibı bilim berýdiń aýyl muǵalimderine úzdiksiz qoljetimdiligin keńeıtedi. Bul jaǵdaı aýyldyń kadrlyq jáne ekonomıkalyq áleýetti arttyrady», - dedi J. Meldeshov.

Budan ózge, HBO prezıdenti óziniń baıandamasynda Astana jáne Almaty ortalyqtarynda jarty jyldyq oqýdy jáne keıinnen Ulybrıtanıanyń til ortalyqtarynda jarty jyldyq oqýdy kózdeıtin «6+6» tildik daıarlyǵynyń jańa úlgisi týraly aıtyp ótti.

«Búgingi tańda oqyp jatqan stıpendıattardyń sany 60-ty quraıdy. Ótken jyldan beri mektepten ótken 173 stıpendıat shetelge oqýǵa tústi. Biz keleshekte Qazaqstanda kezeń-kezeńimen tolyq tildik daıyndyq kýrsyna aýysatyn, barlyq óńirlerde mektepter ashýdy josparlaýdamyz», - dedi J. Meldeshov.

Eske sala keteıik, Astanada Ortalyq Azıadaǵy aýqymdy Bolashak Alumni Reunion Conference and Education Fair-2016 (BARCEF-2016) «Bolashaq» baǵdarlamasynyń İİİ halyqaralyq konferensıasy ótip jatyr.

---