InfoHub Logo

QR Bilim jáne ǵylym mınıstri Erlan Saǵadıev óz qyzmetkerlerin jumystan ýaqtyly úılerine jiberedi, dep habarlaıdy QazAqparat.

«Jumystan 18-00-de jiberetin bolamyz. Qoryqpańyzdar. Qazirdiń ózinde biz jumystan dál osy ýaqytta bosatýdamyz.  Búginde barlyq sátterdi qarastyryp, kelisýdemiz. Biz ózimiz saǵat 18-00-de jumystan bosatýǵa tyrysamyz. Bizde eńbek zańnamasy talaptaryn barynsha qatań oryndaý týraly nusqaýlyq boldy. Men bul isti Úkimetten bastaýdy usyndym. Óıtkeni, egerde ony áýeli Úkimet bastaıtyn bolsa, soǵan oraı qalǵandaryna da birshama jeńil bolar edi. Biz ózimizdiń mınıstrlikte bul prosesti bastadyq. Bul qandaı nátıje beretindigin kúteıik», - dedi Saǵadıev «Bolashak Alumni Reunion Conference and Education Fair - 2016 (BARCEF - 2016)» "Bolashaq" baǵdarlamasynyń III halyqaralyq konferensıasy asynda BAQ ókilderine bergen suhbatynda.

Aıta keteıik, osy aptada ótken Úkimet otyrysynda elimizdiń bilim jáne ǵylym mınıstri Erlan Saǵadıev memlekettik qyzmetshilerdi úılerine, balalarynyń janyna keshki 6-dan keıin jiberý qajet degen bastama kótergen bolatyn.

«Ata-analardyń balalardy tárbıeleýdegi róli men jaýapkershiligi tómendep ketti. Ata-analar únemi jumysta bolǵandyqtan, balanyń tárbıesimen aınalysýǵa ýaqyty bolmaıdy. Onyń ishinde memlekettik qyzmetkerler de kóp. Qazirgi ýaqytta tek 10-12 paıyz ata-analar ǵana mekteptegi jınalysqa qatysady. Bizdiń esebimiz boıynsha, ata-analardyń 50 paıyzy 11 jyldyń ishinde mektepterge kelmeıdi. Bizdiń oıymyzsha, ata-analardy saǵat 6-dan keıin ýaqytynda úılerine, balalaryna jiberý tájirıbesin bastaý qajet», - dedi Saǵadıev.

---