InfoHub Logo

Estaı kúni-túni birese uıaly telefonyna, birese qolyndaǵy dronǵa shuqshıyp, birnárse jasaıdy da jatady. Ákesi:

- Balam, ákelshi andaǵy nárseńdi... Kóreıin qansha kúnnen beri shuqylap jatqan, bul ne ǵajap ekenin? - dedi.

- Minekıińiz, dron ǵoı! Aldynda kókem ákelip bergen.

- Buzylyp qaldy ma?

- Joq, istep tur. Tek qalaı jasalǵanyn zerttep júrmin.

- Ol nege qajet? 

- Bolashaqta barlyq memleketter ózderin tek osyndaı tehnıkalardyń kómegimen qorǵaıtyn bolady. Adamdar soǵyspaıdy. Al meniń batyr bolǵym keledi! Beıbit kúnniń batyry bolyp, el qorǵaýǵa óz aqyl-oıymdy, bilimimdi qosqym keledi! 

- Jaraısyń ulym! Men seni bosbelbeý, qara kúshke joq bala bola ma desem, sen naǵyz bolashaqty oılaıtyn azamat ekensiń ǵoı? Mundaı oı basyńa qaıdan kelip júr?

- Jańalyqtan kórdim. Túrik azamaty óz eline shabýylǵa shyqqan myqty tankterdi, dronmen-aq qırata saldy! Adam shyǵyny bolǵan joq! Keremet emes pe?

- Álbette, keremet!

- Biz de ıadrolyq qarýymyzǵa senbeı, ozyq ǵylymı-tehnıkalar jasaýymyz qajet. Álem aıaq tartatyn, jerimizge kóz tigýden qorqatyn, damyǵan el bolýymyz qajet.  Ol úshin ár bala óz mashınasyn oılap tabýy tıis.

Ákesi ary qa­raı ulynyń sózin estimedi.  Ózi kúnige jumsap, keıde maqtap, keıde ursatyn balasy, naǵyz ǵalym sekildi eljireı qarady. İshteı: "bar malymdy satsam da, ulyma robototehnıkany oqytpasam" - dep oılady.

Al, balaqaı! Sen ne oınap júrsiń? Seniń dostaryń ǵylymǵa bet buryp jatyr! Jańalyq ashpaqshy.. El qorǵaıtyn zamanaýı tehnıka jasamaqshy!  Sende qandaı arman bar? 

Ár bala - bolashaq el azamaty. Al azamattarǵa elin qorǵaý - paryz! 

Gúlmeken Qasenbaı.

---