InfoHub Logo

Ár júz jylda dúnıeniń halqy aýysady, ıaǵnı burynǵy ómir súrgender ketip, jańa adamdar keledi. Bir zamandary basqalardyń múlki bolǵan nárselerdi qazir biz qoldanýdamyz, bizden keıin de basqalar qoldanady. Bir qonaq úıde tursańyz, ol jerden shyǵarda «myna tósekti, perdeni alyp ketemin» deı alasyz ba?! Sizge «aqylyńnan aljasqanbysyń, bul seniń múlkiń emes, osy jerdiki» dep jaýap beredi. Adamnyń ómiri jaıalyqpen kebinniń ortasynda ótedi. Ekeýi de mata, ekeýi de qaltasyz bolady. Bos kelip, bos ketesiń. Olaı bolsa, alyp kete alatyn nárseń ómirde jasaǵan amaldaryń bolmaq...

Qoldan, aıaqtan arylǵanyńda, ıaǵnı ajal qushyp tabytqa qoıylǵanyńda namaz, oraza, ilim úırený toqtaıdy. Kebinmen birge amal dápteriń de jabylady. Biraq sadaqa-ı jarıa dep atalatyn seniń sebebińmen júzege asqan ıgi isteriń bolsa, netken baqyt! Bireýge ilim úıretkeniń, jaqsy ul-qyz ósirip, jaqsy shákirt jetildirip, artyńnan qaldyrǵan jaqsy qyzmetiń, jaqsy amalyń bar bolsa, ólgennen keıin de saýap jazylýy toqtamaıdy. Men qartaıǵanda, qol-aıaqtan arylǵanda, bir shetke jınap qoıǵan dúnıem bolsyn, jalǵa beretin úılerim bolsyn dep fánı dúnıeniń qamyn oılaıtyn musylman qalaısha ólgennen keıingi ómirdiń qamyn oılamaıdy, osyny túsinbeımin...

Sáttilikke jetýdiń eń úlken sebepteriniń biri rýhanı senimdilik, kúsh-qýat. Bir qoǵamda ózara qurmet, mahabbat paıda bolsa, qyzmetter aldyńǵy qatarǵa shyǵady, ósek áńgimeler azaıady nemese múldem joıylady. Onyń ornyna duǵa keledi. Árıne qyzmetter kóbeıýimen Allahtyń meıirimi, rahmeti kóbeıedi, rahmet kóbeıýimen meıirimdilik artady, meıirimdilik artýymen bereke artady. Bereke kóbeıýimen adamdardyń tynyshtyǵy, baqyty artady. Allah úshin bolmaǵan iste qaıyr jáne mahabbat bolmaıdy, bar dep oılanǵan nárselerdiń bári aldamshy.

---