InfoHub Logo

Jyl saıyn elimizde qazannyń alǵashqy jeksenbisi ustazdar kúni merekesi retinde atalyp ótedi.

Ustaz – qasıetti uǵym. Uly Abaı «Adamnyń adamgershiligi jaqsy ustazdan» degen bolatyn.

Al Ybyraı Altynsarın «Men úshin jaqsy muǵalim bárinen de artyq, óıtkeni muǵalim – mekteptiń júregi» deıdi.

Eske salsaq, ustazdar kúni merekesi 1965 jyly 29 qyrkúıekte KSRO Joǵarǵy Keńesi Prezıdıýmynyń buıryǵymen bekitilgen.

QR Ulttyq statısıka búrosynyń deregine sáıkes, 2021-2022 oqý jylynda elimizde 555 014 pedagog eńbek etken.

Byltyrǵy oqý jylynyń basynda mektepke deıingi uıymdardaǵy pedagog sany 96 723 adamdy qurady, onyń ishinde:

30 jasqa deıingi pedagogter – 22,7% (21 931 adam)

30-dan 39 jasqa deıingi pedagogter – 32,4% (31 363 adam)

40-tan 49 jasqa deıingi pedagogter - 26,1% (25 259 adam)

50-den 59 jasqa deıin – 16,2% (15 662 adam)

50 jastan joǵary – 2,6% (2 508 adam)

zeınetkerlik jasta – 2,5% (2 445 adam).

Al jalpy bilim beretin mektep ustazdarynyń sany ótken oqý jylynda 385 830 adamdy qurady, onyń ishinde 80% astamy - áıel (311 623 adam).

Sondaı-aq, ulttyq búronyń málimeti boıynsha elimizde 36 378 pedagog joǵary oqý ornynda eńbek etip jatyr.

Endi ustazdar qaýymyna qatysty Qazaqstanda iske asyp jatqan reformalar men jańashyldyqtarǵa toqtalyp ótsek. Bıyl Memleket basshysynyń tapsyrmasy boıynsha muǵalimderdiń eńbekaqysy 25 paıyzǵa artty. Bul maqsatta aldaǵy úsh jylda 1,2 trln teńge bólinetini aıtyldy.

Budan bólek, Prezıdent bıyl Qazaqstan halqyna Joldaýynda pedagogıkalyq joǵary oqý oryndaryn akredıtteýdiń jańa standarty qabyldanatynyn aıtty.

«Jańa Qazaqstandy qurý isinde muǵalimderdiń róli aıryqsha ekeni sózsiz. Memleketimizde sońǵy jyldary ustaz mamandyǵynyń abyroı-bedelin arttyrý úshin kóp jumys jasaldy. Degenmen bul baǵytta áli de birshama ózgerister qajet. Pedagogıkalyq joǵary oqý oryndaryn akredıtasıalaýdyń jańa standarty qabyldanady. Sondaı-aq ustazdardyń quzyret aıasy aıqyndalady. Jahandyq ǵylymı-tehnıkalyq damý barysyn eskersek, joǵary synyptarda jaratylystaný-matematıka pánderin jáne aǵylshyn tilin oqytýdy barynsha kúsheıtý mańyzdy», - degen edi Qasym-Jomart Toqaev.

Taıaýda belgili bolǵandaı, elimizde «Pedagog» kásibı standarty qabyldanady. Ol boıynsha jumys aıaqtalýǵa jaqyn. Bul týraly QR Oqý-aǵartý mınıstri Ashat Aımaǵambetov málim etken edi.

Sonymen qatar dástúrge aınalǵan respýblıkalyq «Úzdik pedagog-2022» baıqaýyna ótinim sany bıyl rekordty kórsetkishke jetti. Elimizdiń ár óńirinen 5 myńnan astam muǵalim men tárbıeshi qatysýǵa nıet bildirgen.

Aıta ketsek, bıyl mereke qarsańynda QR Oqý-aǵartý mınıstrligi ustaz eńbegi týraly derekti fılm ázirledi. Fılmde muǵalimderdiń kúndelikti ómiri, olardyń eńbeginiń mańyzy, jetistikteri, qyzyǵýshylyqtary, tájirıbesi men bilimi kórsetiledi.

---