Sońǵy jańartý

(Ózgertilgen ýaqyty 2 kún buryn)
Muǵalimderge budan da qolaıly jaǵdaı jasaýdy jalǵastyra beremiz - Ashat Aımaǵambetov

Oqý-aǵartý mınıstri Ashat Aımaǵambetov muǵalimderdi kásibı merekemen quttyqtady.

Ol bul jaıynda óziniń Telegram paraqshasynda jazdy.

«Qymbatty áriptester! Sizderdi kásibı merekemen shyn júrekten quttyqtaımyn. Ustaz - ol tek mamandyq qana emes, sonymen birge arnaıy aǵartýshylyq mısıa. Sizder kún saıyn balalardy bilim nárimen sýsyndatyp, olardyń daryndaryn ashýǵa, durys qundylyqtardy boılaryna sińirýge kómektesesizder. Búgingi kúni elimizdegi bilim berý júıesi - 500 myńǵa jýyq ustazymyz eńbek etetin úlken sala. Qasym-Jomart Kemeluly Toqaev Prezıdent bolyp saılanǵannan keıin birden muǵalimder korpýsyn qoldaý úshin barlyq sharany qabyldaýdy tapsyrdy. Osylaısha 2019 jyly «Pedagog mártebesi týraly» zań qabyldanyp, muǵalimderdi shamadan tys esep berýden, mindetine jatpaıtyn fýnksıalardan bosatýǵa jaǵdaı jasaldy. Biliktilik sanaty, magıstratýra, synyp jetekshiligi, dápter teksergeni jáne t.b. úshin ár túrli qosymsha tólemder engizilip, olardyń kólemi ulǵaıtyldy» dep jazdy mınıstr.

Ashat Aımaǵambetovtyń aıtýynsha, Memleket basshysynyń sheshimderi arqasynda muǵalimderdiń jalaqysy birneshe jyldan beri jyl saıyn 25%-ǵa kóterilip keledi.

Bıyl 25 jyldan astam eńbek etken barlyq ustazǵa arnaıy marapat taǵaıyndalǵan. Óıtkeni óz isine osynsha jyl adal qyzmet etken mamandar erekshe qurmet pen qoldaýǵa laıyq.

Sonymen qatar 30 jyldan astam pedagogıkalyq tájirıbesi bar muǵalimder sanattar men aı saıynǵy qosymsha tólem alý úshin tapsyratyn testileýden bosatyldy.

Qyrkúıek aıynan bastap el mektepteriniń basym kópshiligi bes kúndik oqý aptasyna aýysty. Sondyqtan mınıstrlik osy mektepterdiń muǵalimderine senbini qosymsha demalys kúni retinde berýdi jón kórgen.

«Endi ózderińizge jáne jaqyndaryńyzǵa kóbirek kóńil bóle alasyzdar. Kelesi jyly qańtar aıynan bastap mektep, kolej jáne qosymsha bilim berý uıymdaryndaǵy barlyq pedagogtiń jalaqysy taǵy 25%-ǵa ósedi. Sondaı-aq kelesi jyly el Prezıdentiniń tapsyrmasy boıynsha balabaqshalardaǵy barlyq tárbıeshiniń jalaqysy ósedi. Biz bul baǵyttaǵy jumysty toqtatpaı, budan da qolaıly jaǵdaı jasaýdy jalǵastyra beremiz. Pandemıa kezinde de ózderińizdi laıyqty kórsete bildińizder. Kóptegen ata-ana sizderdiń jumysyńyzdyń qanshalyqty jaýapty jáne qıyn ekenin taǵy bir márte túsindi. Al balalar muǵalimniń meıirimdi kózqarasy, jyly sózi, onyń kómegi qanshalyqty mańyzdy ekenin sezindi. Men qala jáne aýyl mektepterine barǵanda áriptesterimmen áńgimeleskendi unatamyn. Sizderdiń bilim salasyna sińirip jatqan qajyrly eńbekterińizdi kórip, isterińizge degen súıispenshilikterińiz jáne adaldyqtaryńyz úshin alǵysymdy jetkizgim keledi. Ustazdar kúni qutty bolsyn!» dep túıindedi sózin Oqý-aǵartý mınıstri.


You Might Also Like

Jańalyqtar

Jarnama