InfoHub Logo

Zaısan óńirinde sulý Saýyr taýynyń bir saıy «Bulanbaı jaılaýy» dep atalady. Sarqyrap aqqan taý ózeniniń sol jaq bıik jarqabaǵynda taı qazandaı qara tas bar. Bul tasty Bulanbaı bıik dóńge shyǵaryp, ózine máńgilik eskertkish etip ketken. Balýannyń alyptyǵyn at kótere almaǵandyqtan, ony barar jerine túıege mingizip aparatyn bolypty.

Balýan týraly el aýzynda mynadaı bir áńgime bar. Bulanbaıdyń otyzǵa taqaǵan shaǵy eken. Ol arǵy betten jaılaýǵa qaraı túsken bes qytaıdy kóredi. Olar «biz bul elden alym-salyq jıǵaly keldik» dep qaǵazdaryn kórsetedi. «Ketińder bul jerden» degenge kónbegen qytaılardy Bulanbaı qamshymen bir-bir salyp, tereń quzdan laqtyryp jiberedi. Qytaı eli ásker shyǵaryp, búkil eldi qyramyz dep eskertedi. Sonda Bulanbaı óz erkimen berilip, túrmege túsipti.

Bir kúni Qytaı ımperatory záýlim saraıdyń aldyndaǵy arystannyń tas músinin kótergen adamnyń tilegin oryndaımyn dep jar salypty. Kúshin synaýǵa kelgender músindi ornynan qozǵalta da almapty. Sonda bir ýázir: «Bul tasty túrmede jatqan qazaqtyń balýany kóterýi múmkin», — deıdi.

Imperatordyń buıryǵymen Bulanbaıdy arystanǵa alyp keledi. Ol: «Maǵan bir aı mursat etińizder. Aldymen qoıdyń etin berińizder. Sonan soń eki qolymdy ıyǵyma deıin qaıys arqanmen shandyp baılasańyzdar, men tasty kóteremin», — dep jaýap qaıyrypty. Bulanbaıdyń tilegi oryndalady. Dúıim eldiń aldynda ol arystannyń tas músinin qos qoldap keýdesine qoıyp, ile-shala basynan asyra kóteripti. Kúshine razy bolǵan qytaı ımperatory Bulanbaıdy syı-sıapatpen eline qaıtarǵan eken.

---