Bular kim ústi-basyn munar japqan,
Jalqaýlyq bir-birinde alty batpan.
Aıaǵyn alǵa qaraı bir baspaıdy,
Jolyna qurylǵandaı almas qaqpan.

Óz ara janjaldasyp qanǵa batqan,
İshinde túrli pitine tolyp jatqan.
Basqany óz qarnynan oılamaıdy,
Mal berse, ary túgil janyn satqan.

«A, qudaı, bere kór!» dep tynysh jatqan,
Taǵdyrǵa barlyq isin úıip artqan.
Ózi jatyp qudaıdy jumsamasa,
«Kápir boldyń» deıtuǵyn molda tapqan.

Jaý bolyp birin-biri kúnde shapqan,
Jasy, qarty — bári de bále baqqan.
Soqyrǵa jan-tánimen basyn uryp,
Kózdisin kómir qylyp otqa jaqqan.

Aýrýy ońalmastaı túri jaman,
Túsinter bulardy aıtyp qandaı adam.
Ekenin durys-burys bile almaımyn,
Beredi bylaı jaýap bireý maǵan:

– «Kóringen sizdiń kózge nashar jandar,
Bolady jalqaý, nadan musylmandar.
Ujmaqtan aı men kúndeı hordy kútip,
Basqaǵa keń dúnıeni usynǵandar.

Bulardyń túrik edi arǵy zaty,
Jıhandy titiretken saltanaty.
Bul kúnde azyp-tozyp kúlki bolǵan,
Bular da sol túriktiń juraǵaty».

---