InfoHub Logo

Almaty qalalyq bilim basqarmasynyń ókilderi 2023 jyly mektep formasy qalaı ózgeretinin aıtty. 2022 jylǵy 30 jeltoqsanda Oqý-aǵartý mınıstri qol qoıǵan buıryq 5-shi qańtardan bastap kúshine endi.

Óńirlik komýnıkasıalar qyzmetiniń onlaın brıfıńinde Almaty qalalyq bilim basqarmasynyń Rýhanı-adamgershilik tárbıe bóliminiń basshysy Nurgúl Taý qyzdar men uldar úshin mektep formasyna túıme nemese sydyrmasy bar trıkotaj kúrte (kardıgan), polo jeıde nemese tenıska qosylǵanyn málimdedi.

Er balalarǵa arnalǵan mektep formasy:

— pıjak, jılet, shalbar, merekelik jeıde, kúndelikti jeıde, ne túımeleri bar nemese sydyrmaly toqylǵan kúrte (kardıgan), polo jeıde nemese tenıska (qys mezgilinde: trıkotaj jılet, vodolazka). Uldarǵa arnalǵan shalbarlar erkin tigilgen jáne uzyndyǵy boıynsha tobyqty jaýyp turady.

Qyz balalarǵa arnalǵan mektep formasy:

— pıjak, jılet, beldemshe, shalbar, klasıkalyq jeıde, ne túımeleri bar nemese sydyrmaly toqylǵan kúrte (kardıgan), polo jeıde nemese tenıska (qysqy ýaqytta: trıkotaj jılet, sarafan, vodolazka). Qyzdarǵa arnalǵan shalbarlar erkin tigilgen jáne uzyndyǵy boıynsha tobyqty jaýyp turady.

Merekelik formaǵa (uldarǵa aq kóılek, qyzdarǵa aq blýzka) qoıylatyn talap alynyp tastaldy. Sondaı-aq, galstýk taǵý endi mindetti element emes.

Nurgúl Taýdyń aıtýynsha, Almatyda túsindirý jumystary bastalǵan.

«Bizde qazir oqý jylynyń ortasy boldy. Jańa oqý jylynan bastap ár mekteptiń qamqorlyq keńesi ata-analarmen keńesip, olarǵa qajetti stıldi tańdaıdy», — dedi ol.

Bul rette ol bala qazir polo nemese jılet kıgisi kelse, onda oǵan quqyly ekenin aıtty.

Ol sondaı-aq bala tıisti mektep formasyn kımese, kimniń jaýapty bolatynyn jetkizdi.

«Buǵan synyp jetekshisi jaýapty emes, biraq ol oqýshylarmen, ata-analarmen túsindirý jumystaryn júrgizip, oqýshynyń mekteptegi kıim úlgisine ata-anasy jaýapty ekenin jetkizýi kerek. Eger bala mektep formasyn kımese, onda Bilim berý salasyndaǵy sapany qamtamasyz etý departamentine hat joldanady, onda tıisti jumystar júrgiziledi», — dedi ol.

Almaty qalasy bilim basqarmasynyń ákimshilik-quqyqtyq bólim basshysynyń mindetin atqarýshy İlıas Oralbaev ıýbkanyń túsi, stıli, uzyndyǵyn orta bilim berý uıymy jáne mekteptiń ata-analar jınalysynyń hattamasymen bekitilgen Qoǵamdyq keńes belgileıtinin aıtty.

Jańa erejege sáıkes, mektep formasyna orta bilim berý uıymynyń erekshelik belgileri: emblema, tigispe, shevron ornalastyrýǵa ruqsat etiledi.

Mektep formasyna arnalǵan matalar — sapasy jaqsartylǵan, tez tozbaıtyn, bakterıa, mıkrobqa qarsy jáne antıstatıkalyq qasıetteri bar jartylaı jún jáne maqta matalar bolǵany jón. Buryn bul mindetti talap bolatyn.

---