InfoHub Logo

Memlekettik organdar sekildi, mektepterde de vıdeokamerasy bar, ınternetke qosylǵan telefondarǵa tyıym salý kerek. Muǵalimderdiń mártebesi týraly Parlament Senatynyń depýtaty Dınar Nóketaeva QR Premer-Mınıstriniń atyna depýtattyq saýal joldady.

«Bizdiń depýtattyq saýal QR Premer-Mınıstrine joldanady. Saýalymyzǵa negiz bolǵan jaıt sońǵy kezderdegi mektepterde beleń alyp bara jatqan ustazdarǵa degen kózqaras, adamı molardyq qatynas, BAQ pen áleýmettik jelilerdegi ustazdardyń Parlament depýtattaryna ózderiniń oqýshylar men ata-analarynan qorǵaý suraǵan jan aıqaılary», - deıdi senator.

Onyń aıtýynsha, Elbasy «Bolashaqqa baǵdar: Rýhanı jańǵyrý» atty maqalasynda bilimniń mańyzdylyǵyn atap ótken.

«Ustazdarǵa degen de qurmet erekshe bolýy kerek. Memleket muǵalimderdi jan-jaqty qoldaý sharalaryn júrgizýde. Memleket basshysynyń tapsyrmasyna sáıkes, Úkimet muǵalimniń mártebesin arttyrý maqsatymen bilim berýdiń jańartylǵan mazmunyna kóshken ustazdardyń laýazymdyq jalaqysyn 30 paıyzǵa arttyrý týraly qaýly shyǵardy. Solaı bolǵanymen, qazaqstandyq ustazdardyń ózderi bilim berip júrgen oqýshylarynan qysym kórýi ádiletsiz bolyp tabylyp otyr desek artyq bolmas. Ustazdardy balaǵattaý, tipti qol jumsaý, balalardyń tárbıesizdigine kinálaý, taǵy sol sekildi materıaldardy BAQ pen áleýmettik jelilerden kórip júrmiz», - deıdi ol.

Senator óz sózinde «Qasıetti ustaz» degen mártebeli mamandyqtyń búgingi tańda qunsyzdanýy ókinishti ekenin bildirdi.

«Búgin ata-analardyń tarapynan balalardyń kózinshe muǵalimderge ártúrli balaǵat jáne dóreki sózderdi qoldaný arqyly jas jetkinshekterdiń óz ustazdaryna jekkórýshilikti týǵyzyp, olarǵa degen qurmettiń tómendeýine ákelip soǵýda. Muǵalim beınesi qaýqarsyz, quqyǵy taptalǵan adamǵa aınaldy. Ustazdarǵa degen senimsizdik kúnnen-kúnge, ata-analardyń tarapynan údemese báseńdegen joq. Óıtkeni, dıktofon, fotoaparat, mobıldi telefon qoldaný arqyly oqýshylar muǵalimderdiń bedelin túsirip jatyr», - deıdi Dınar Nóketaeva.

QazAqparat

---