InfoHub Logo

Bólme. Sham jaryǵy. Soǵylǵan saǵattyń úni. Únsizdik. Noýtbýktyń aldynda birtalaı ýaqyt otyrǵan Aısáýle. Ol bir sát bar álemnen bólektenip ketkendeı kúıde. Eshkimniń sózine qulaq asar emes. Eshkimge til qatar emes. Ózimen ózi otyrǵan qalpy...

Aısáýleniń ómirinde aýyr kezeńder de, kóz jasy da, túńilý de bolǵan. Onyń tolyqqandy ómirge qaıta oralýyna myna ǵalamtor sebepker me eken?! Álde...  Ne bolsa da bul noýtbýkpen onyń jaqyn arada qoshtasatyn túri joq.

Zymyraǵan ýaqyt. Kúnder. Túnder. Óz áleminde ómir súrip jatqan Aısáýle. Ǵalamtor. Áleýmettik jeli. Sansyz hattar. Jyly sózder. Tilekter. Munyń bárin  Aısáýlege joldap jatqan áleýmettik jelide tanysqan jigiti, Asqar Saqtaǵanov degen azamat. Aısáýle Asqarǵa senedi, endigi bar oıy onymen kózbe-kóz jolyǵý, jaqynyraq tanysý. Aısáýle ol kezdesýge áli ishteı daıyn emes sıaqty. Kezdesý týraly Asqar da áli sóz qozǵar emes.

Tań. Terezeden bólmege túsken kún nury. Uıqydan oıanǵan Aısáýle. Qyzyq, ol ádettegideı emes, búgin noýtbýkty qosýǵa asyqpaıdy. Áldenege kóńildenip, máz bop jatyr.

Sáske. Sabaǵynan qaıtyp kelgen Aısáýle túski asyn isher-ishpesten bólmesine asyqty. Noýtbýkty qosqan ol ornynda qatyp qaldy. Kópten  kútken armany...

Temir jol vokzaly. Jan-jaqqa asyǵyp jatqan adamdar. Biriniń artyna biri ilesip jatqan mashınalar. Júrek lúpili. Kútý. Qobaljý. Aısáýle armanynyń oryndalýyna sanaýly ǵana mınýt qaldy. Shamaly ǵana qaldy.

Aıaldamaǵa jaqyndaǵan bir beıne. Suńǵaq boıly, symbatty jigit. Osy ma eken? Qýanysh sezimi qyz júregine uıalaǵandaı.

Uıaly telefonǵa kelgen sms. Aısáýle, keshir meni... Mendeı jaman adamdy. Men sen oılaǵandaı emespin. Úılengenmin, eki balam bar. Aıta almadym, keshire gór. Seni kezdesýge shaqyrdym, biraq barar betim joq. Qosh...

Sóndi úmit. Sońǵy úmit. Qaldy este buldyr eles. Kóz  de kórmes. Sóz de qalmas. Endi  bul sát qaıtyp kelmes.

Vokzal. Aınala aǵylǵan halyq. Zor daýyspen aıǵaı salatyn taksıster. Aýylǵa asyǵyp jol sómkelerin arqalaǵan stýdentter. Aıaldama. Qatyp qalǵan qalpynda turǵan Aısáýle. Úmiti úzilgen Aısáýle. Ómirden qaıta túńilgen Aısáýle...      

Jaksybaeva Botagoz Jaksybaevna      

---