InfoHub Logo

Aldymen bári kóz aldyma keledi. Sonan soń estımin, estımin de jazýǵa otyramyn.

(3-dápter, 46-bet).

SOS

I

Soıýyńa qarsymyn!

Qarsymyn!

Qarsymyn!

Men dárıadan qalǵan tamshymyn.

Qańsydym...

Osy – bar shynym.

Soıýyńa qarsymyn!

Aldaǵan eken ǵoı qý balam,

Qaraǵaı ekem ǵoı qýraǵan!..

Tıdirmen deneme pyshaqty,

Soıylý úshin men týmaǵam!

Aldadyń, qý balam, aldadyń,

Osy ma ańsaǵan armanym?!

Soıdyrman, jarqynym,

Kóremin jazýyn allanyń.

Ata, sen ólesiń be, shynymen ólesiń be?!

(3-dápter, 59-bet).

1967-jyldyń 27-qarashasynyń túni. Tús. Ǵajap tús!!! "Túzelesiń, sen túzelesiń!" Ǵajap! Eki toptyń ortasy! V.I.L.

(4-dápter, 1-bet).

1967-jyly neler tynýy kerek

1. Samuryq (Baýyrjan Momyshulyna arnalǵan). Sáýirdiń ishinde.

2. SOS! (Poema. Bolǵan oqıǵa izimen). "Spasıte nashıh dýsh" (Qutqar bizdiń rýhty). Mamyrdyń ishinde.

3. Nazym (Poema. Qaraqalpaq áserinen).

4. Óleńder. Jınaq daıarlaý.

5. Dante "Ǵarasat maıdany". Bastaý, barynsha aıaqtaýǵa tyrysý

6. Dramanyń sońǵy varıantyn (nusqasyn) tyndyrý.

7. Poezıa týraly úlken áńgime.

Bir jylǵa sol da jeter. Jolyń bolsyn!

Kezek kúttirmeıtinderi:

1. Ońtústik, Qyzylqum áserleri. Jınaqqa

2. Qaraqalpaq áserleri.

(4-dápter, 2-bet).

Dalanyń qoıý túni-aı balbyraǵan!

Juldyzdyń kózin qara jaýdyraǵan.

Taýlardyń ózin qara abdyraǵan,

Qalǵyǵan qabaǵy anaý salbyraǵan.

(4-dápter, 5-bet).

Kim eken irenjitken qyz balany?

(4-dápter, 14-bet).

Alataýym turǵanda,

Arqasyzbyn deı alman.

Qarataýym turǵanda,

Qaltasyzbyn deı alman.

(4-dápter, 19-bet).

Taǵy da kún shyǵady, tań atady,

Jatady tún jamylyp dala taǵy.

Jalǵyz ǵana jyr týsam, jalǵyz ǵana,

Sekildi samuryqtyń balapany.

(4-dápter, 26-bet).

Latvıa, Lıtva, Estonıa, RSFSR, Ýkraına, Belarýsıa, Armenıa, Ázerbaıjan, Grýzıa, Tájikstan, Týrkmenıa, Ózbekstan, Qazaqstan, Qyrǵyzstandardan, poezıa, seni izdedim...

(4-dápter, 73-bet).

"Borás s prodajnymı fransýzamı, ıa zashıshaıý Fransıý" (Satqyn fransýzdarmen kúresý arqyly men Fransıany qorǵaımyn).

R. Rollan.

(4-dápter, 80-bet).

"Mahabbat mazary". Poema.

(4-dápter, 84-bet).

Kúnine úsh óleń, qalaıda úsh óleń! 7.11.1972-j.

(7-dápter, 13-bet).

1972-j. 8-aqpan keshki saǵat 17.30 mıymda dáneńe joq otyrmyn.

"Tájela ty, shapka Monomaha". (Aýyrsyń-aý sen, Monomahtyń bórki).

(7-dápter, 20-bet).

Jetedi, jospar búgin oryndaldy! Ia, sát! 9-aqpan túngi saǵat 2.30

Jaqsy tús kór!!!

(7-dápter, 25-bet).

(Joǵarydaǵy saǵat 17.30 men 2.30-nyń aralyǵynda, ıaǵnı 9 saǵatta "Keshirgin, qala", "Úsh baqytym" 57 joldan turatyn eki óleń jazypty. Bul "mıynda dáneńe joqtaǵysy"! – qurastyrýshy O.A.)

Búgin týǵan kúnim, 41-ge keldim. Densaýlyq jaqsaryp keledi. Jazýǵa sumdyq zaýqym bar... Áıelim, balalarym syı-qurmet kórsetti. Úıge Abaı keldi: búsi. Jaqsylyqtyń nyshany. Poehalı!

9-aqpan 1972-jyl (7-dápter, 27-bet).

Búgin jospar oryndalatyn túri joq. Qulqym shappaıdy. Eki ıyǵymnan birdeńe basyp tur. Bir túrli álsizdik bar, onyń ústine ishi qurǵyr aýyryp, otyrǵyzbaı barady. Tún jarymy bolmasa tań atarda ma, qalaıda jospardy oryndaýym kerek.

10-aqpan 1972-jyl (7-dápter, 33-bet).

Akademıada kezdesý boldy. Barmaýǵa da bolýshy edi, amal ne, "Qazaq ádebıeti" habarlama berip, tizimge endirip qoıypty. Ánýar baıandama jasady. Qazaqsha. Táp-táýir, ana tilinde sóılep shyqty. Muzafar, Ǵafý bolyp óleń oqydyq Bári de durys qaı, biraq búgingi josparym taǵy da oryndalmaıtyn qaýip bar. Mıymda túk joq.

11-aqpan 1972-jyl (7-dápter, 33-bet).

Endi uıyqtaýyńa bolady. Jospar oryndaldy. Iá, jospar! Josparsyz jumys istep kór...

15-aqpan 1972-jyl (7-dápter, 59-bet).

Aqpannyń 5-inen 15-ine deıingi 10 kúnde 27 óleń.

(7-dápter, 66-bet).

Ári qaraı ne bolady? Keıin? Odan soń? Bilmeımin...

27-aqpan 1972-jyl (8-dápter, 37-bet).

Aqpan aıaqtaldy. Bul aı jaqsy boldy men úshin. Baıandamaǵa kirissem be eken, óleńdi qoıa turyp. Álde jıyndy sáýirge sozýǵa áreket jasasam ba?

29-aqpan 1972-jyl (8-dápter, 44-bet).

Baıqa! Jalǵan aıtpa! Esinde bolsyn, aqylgóısime! Este usta: sen eshkim emessiń! Sen – aqynsyń. Abstraksıanyń anasy – obraz. Poezıaǵa keregi obraz ba, oı ma? Oı!!!

Obraz – oıdyń turlaýsyz múshesi. Óleńniń de.

(9-dápter, 46-bet).

Qaıǵy bar qaıtqan qustyń qanatynda.

Joǵalǵan dápterden este qalǵandar:

1. Jigitter, bórki aýyr Monomahtyń.

2. –"–, meniń atym qańtarýly.

3. Armanda, janym...

4. Qazaq seni syılaıdy qashanda da.

5. Osy men jylańqy bop baratyrmyn.

6. Janym-aý, jalǵyz qaıtip shydap júrsiń?

7. Motordyń únin esite-esite sharshadym.

8. Baqqa bardym???

9. Dostyq dombyra týraly birdeńeler, t.b.

Ekinshi dápterdegilerdiń birsypyrasy "MAVRDA".

Joqtary:

1. Shirkin-aı, jurtym maǵan bir at berse.

2. Meniń kishkentaı kúnim. "QÁ." Sholpanyma.

3. Júrek týraly sıkl.

4. Sup-surǵylt qala.

5. Qulpytastaǵy jazý.

6. Mahabbat, dostyq adamgershilik týraly kóp óleń. Kóbi esimde joq

Jarıalanbaǵan 1000 joldaı óleń.

Joq áli qaıtarmady, joq. Ádeıi istelgen bolý kerek.

"Poezıa" atty kúndeligim, qaıran kúndeligim!!!

Ne aıtyp edim onda?! Joq

1970. (5-dápter, 1-bet).

1973-jyl. Betburys??? Ne isteý kerek? İshpeý kerek! İshpeý kerek!

(10-dápter, 26-bet).

Qalammen jazylǵanyn da, mashınkaǵa basylǵanyn da úsh nusqa pesany joǵalttym. Bálege tap boldym...

16-aqpan 1973-jyl.

Tabyla ma? Qaıdam?

21-aqpan 1973-jyl.

Ózińdi óziń aldama eshqashanda.

"Ańsap júrip kezdestik Sáken toıyna" atty óleń S.Q-nyń tapsyrmasy boıynsha jazyldy.

29-maı 1974-jyl (12-dápter, 90-bet).

Men óleńdi oıdan qurastyryp jazbaımyn. Áldekim qulaǵyma sybyrlaǵandaı bolady. Sony kóshiremin, senesiń be?

M. M. 21-noıabr 1973-jyl (13-dápter, 12-bet).

A.P. Mejırovtan hat aldym. Bul – birinshi bolyp maǵan ómirimniń qıyn kúnderinde ákelik qolyn sozǵan adam. Sizdiń senimińizdi qalaı aqtasam eken, súıikti aqsaqal?!

M. M. 1-dekabr 1973-jyl (13-dápter, 34-bet).

Joǵalǵan qoljazbalar, gazet-jornal qıyndylary, poezıa jónindegi kúndelik áli joq. Sý aıaǵy qurdymǵa ketti. Bireý qasaqana saqtap otyrsa jaqsy. Bilmes bir túleıdiń qolyna túsip jyrtyp tastamasa... Áttegen-aı, jarıalanbaǵandary kóp edi...

5-aqpan 1972-jyl (7-dápter, 2-bet).

1. Aqyl bar, talant joq – Mansapqumar, ataqqumar.

2. Talant bar, aqyl joq – Maskúnem.

3. Ekeýi de bar – Dánishpan.

Abaı jaqqan bir sáýle senbeý úshin.

---