InfoHub Logo

Mektep basshysy Aqmaral Asqarqyzynyń aıaq astynan kitaby joǵalyp ketti. Sirá, mektep basshylary úshin asa qajetti dúnıesin qoıǵan jerinen taba almaı qalsa kerek. Dereý jan-jaǵynda turǵan muǵalimderinen suraı bastady.

- Kitap kórdińder me? Kitap aldyńdar ma?

Qatań minezdi mektep basshysynyń myna suraǵynan jas muǵalıma qyzdar úrpıisip qaldy.

- Joq, Aqmaral Asqarqyzy! Kórmedik. Bilmedik.

- Qaıda kete qoıdy ol kitap?! Álgi ázirde ǵana turǵan sıaqty edi.

Osy kezde mektepke qaraı Álke aǵaı kele jatty. Álkeniń ózi de mektep
tabaldyryǵyn endi ǵana attaǵan muǵalim emes qoı. Bul mektepke kelgenine de bes-alty jyldyń júzi bolǵan. Kimmen qalaı sóılesý kerek, kimniń jel jaǵyna shyǵyp ketpeý kerek ekenin Álke jaqsy biledi. Ásirese, qatań minezdi Aqmaral Asqarqyzynyń jel jaǵyna shyǵa kórmeńiz. Aqmaral Asqarqyzy degenińiz - tek ujymda ǵana emes, ózinen joǵary turǵan basshylardyń aldynda da bedeldi mektep jetekshisi. Álke onyń ústine osy jyldardyń arasynda otbasyn quryp úlgergen, bir tıyndy qalaı eki tıyn etýdi de oılap júrgen jigit.

- Sálemetsiz be, Álke aǵaı!

Osy shákirt qyzdar Álkemen qaljyńdasa beredi. Óıtkeni olar Álke aǵaıdyń jaqsy aǵaı ekenin biledi ǵoı.

Álke osyndaı oılarmen kelip bólmege endi. Aqmaral Asqarqyzy endi álgi suraǵyn Álkege qoıdy:

- Álke, kitap aldyń ba?

Álkeniń basy zyryldap oılanyp ketti. "Bul ne kitap boldy eken? Basshylar suraq qoıǵanda, ámanda oılanyp jaýap berý kerek. E, taptym, taptym! Taǵy da muǵalimderdiń aılyǵyna kitap jazyp berip jatyr deseńshi! Aqmaral Asqarqyzy Álke, sen sol kitapty buryn alyp pa ediń, alsań, saǵan bermeı-aq qoıaıyq dep turǵan ǵoı. Endeshe, aldym dep aıtaıyn".

- Aldym, - dedi Álke qıpaqtap turyp.

Aqmaral Asqarqyzy Álkege tap berdi:

- Ákel kitapty!

Álke ań-tań:

- Qandaı kitap?!

Aqmaral Asqarqyzynyń qarlyǵashtyń qanatyndaı qastary kerildi. Tańdanǵany.

- Qandaı kitabyń ne?! Óziń aldym dep turǵan kitapty aıtam!

Álke sheginshektep ketti.

- Eshqandaı kitap alǵan joqpyn.

Aqmaral Asqarqyzynyń qap-qara kózderinen ushqyn shashyrady. Ashýlanǵany.

- Álke, ne menimen qaljyńdasqyń kelip tur ma?!

Álkeniń samaıynan sup-sýyq ter shyqty. Aqmaral Asqarqyzymen qaljyńdasyp jyny bar ma? Álke bolmaǵan soń shynyn aıtty:

- Men taǵy da muǵalimderdiń aılyǵyna kitap jazyp berip jatyr eken dep oılap...
Aldym desem, qutylyp ketemin be dep...

Bólmede turǵan taýyqtyń balapanyndaı jap-jas muǵalıma qyzdar Álkeniń myna haline býlyǵyp kúlýde.

"Quryp qalǵyr, - deıdi Álke bólmeden sytylyp shyǵa berip. - Aqmaral Asqarqyzynyń kitaby joǵalyp jatyr eken ǵoı. Men taǵy da aılyqqa kitap jazyp berip jatyr eken dep oılap qalyp edim".

---