InfoHub Logo

Táýelsizdiktiń qarlyǵashy sanalatyn «Zaman-Qazaqstan» gazeti-Túrkıa men Qazaqstan arasyndaǵy aqparattyq qural kózine aınalǵan, eki el arasyna rýhanı, mádenı kópir ornatqan basylym. Gazet oqyrmandarǵa áleýmettik-ekonomıkalyq, qoǵamdyq-saıası aqparattar usynady. Osydan jıyrma toǵyz jyl aldyn eki alpaýyt memlekettiń basshylary osyndaı ıgi bastamanyń júzege asqany úshin bir-birin quttyqtap, aq jarma tilekterin joldaǵan bolatyn. «Túrkıadaǵy mán-jaıdy jan-jaqty tanyp, qazaq jurtyna jetkize bilse, Qazaqstanda bolyp jatqan oń ózgeristermen der kezinde bizdi habardar etip otyrsa, nur ústine nur dep biler edim. «Zaman-Qazaqstan» osy maqsatty ustanar degen berik senimmen sátti qadam tilep, qýana quttyqtaımyn»,-dep sol kezeńdegi el prezıdenti Turǵyt Ózal júrekjardy lebizin bildirgen bolatyn.

Mine, sol ýaqyttan beri aradan otyzǵa jýyq jyl ótti. Az ýaqyt bolsa da gazet óziniń dańǵyl jolynan jańylmaı, eki el arasynda aqparattyq baılanys ornata bildi. Gazettiń alǵashqy redaktorlyq qyzmetin abyroımen atqaryp shyqqan  Qaltaı Muhametjan basylymnyń el arasyna keń taralyp, halyqtyń kózaıymyna  aınalýyna súbeli úles qosty. Ult múddesin alǵashqy shepke qoıǵan halyqaralyq basylymda qazir jańa aıdarlar jaryq kórip, oqyrman nazaryna kókeıkesti máselelerdi usynyp otyr. Solardyń biri-«Ákim bol, halyqqa jaqyn bol» aıdary. Osynyń arqasynda qarapaıym halyq tarapynap kelgen saýaldarǵa jaýap bere otyryp, kúrmeýi sheshilmegen tyń máselerdiń sheshimin tabýǵa yqpal etedi.

Gazet 2017 jyly óziniń 25 jyldyq mereıtoıyn toılaıdy. Alaıda, aradan bir jyl óte salysymen gazetke ózgeshe reńk kiredi, ataýyna ózgeris enedi. Kózi qaraqty oqyrmannyń júrek túkpirinen oryn alǵan «Zaman-Qazaqstan» endi «Qazaqstan dáýiri» atty jańa ataýǵa ıe bolady. Búginde bul basylym «halyqaralyq gazet» degen ataýyn joǵaltpaı, údeden shyǵyp keledi. Aqparat, saıasat, rýhanıat, qoǵam, salaýatty ómir, suqbat syndy bólimderi arqyly gazetke jańa lep ákeldi. Gazettiń 9 sáýir kúngi nómirinde Qyzylorda qalasy, Oqýshylar men jasóspirimder úıiniń «Jas qalamger» úıirmesiniń jetekshisi Anar Karajanova esimdi oqyrmannyń «Ulttyq óner-ata dástúr murasy» atty maqalasynda Syr eliniń sheberleriniń márt minezi men ult ónerine degen shynaıy mahabbatyna tánti bolamyz. Sonymen qatar, gazetten til janashyrlarynyń birsypyra maqalalaryna kózimiz túsedi. Ertaı Aıǵalıulynyń 22 sáýir kúni jaryq kórgen maqalasynda búgingi qazaq televızıasynyń jaı-kúıinen habardar bolamyz. Osydan birneshe jyldar buryn elimizde jıyrma tórt saǵat boıy memlekettik tilde aqparat taratatyn arnalar joqtyń qasy edi. Muny kórshiles elder  estigende jaǵasyn ustap, elimizge aıanyshpen qaraıtyn. Osyǵan qaramastan biraz ýaqyttan keıin «Qazaqstan» ulttyq arnasy táýlik boıyna qazaq tilinde aqparat tarata bastady, sonymen elimizdegi eń iri arna taza qazaq tiline kóshti.  Avtor maqalanyń negizgi arqaýy etip «Balapan» telearnasyn alady. Iá, bul arna balalar  arasyna kesh keldi, biraq balalar aýdıtorıasynda osyndaı arnanyń bolýy kóńil qýantady. Maqalanyń negizgi aıtar oıy-bul arnanyń maqtaýyn asyrý emes, kerisinshe balalardy zeriktirip alatyn keıbir keleńsiz tustaryn taldaý. Qarapaıym ómirdegi óz áreketterimen salalastyra otyryp, arnanyń jalyqtyrarlyq kontenti bar ekenin atap ótedi. Máselen, kishkentaı keıipkerler ózderiniń is-qımyl, qozǵalystarymen, sheberlikterimen balalardy ózine tarta bermeıdi. Jasandy kórinister kóbirek. «Mundaı shala jansar dúnıeler óte kóp. HHİ ǵasyrda nebir zamanaýı dúnıelerdi ákelýge tehnologıalyq múmkindikter zor ǵoı. Nege solardy paıdalanbaımyz?»,-dep óz ókinishin bildiredi. Rasynda, ult bolashaǵy osy telearnalarda jasalatynyn eskersek, qazaq televızıasynyń áli de bolsyn áttegen-aı deıtin tustaryn ańǵaramyz. Avtor sóz sońynda: «Bulaq kórseń, kózin ash» degen halqymyzdyń tamasha támsili bar. Endeshe bárimiz jabylyp «Balapandy» kórkeıteıik, onyń deńgeıin ósirýge, jetimdik kórmeýine bar kúshimizdi salaıyq!»,-dep qorytyndylaıdy.

Mine, «Zaman-Qazaqstan» gazetiniń búgingi jańa tolqyny oqyrmanǵa osynaý taǵylymy men ózektiligi ushtasqan tyń aqparattardy usynyp otyr...

Altynaı BAÝYRJANQYZY

---