InfoHub Logo

Ǵylym jáne joǵary bilim mınıstri Saıasat Nurbek Fransıa men Qazaqstan prezıdentteriniń Aqordadaǵy kezdesýi aldynda Qazaq-fransýz ýnıversıteti ashylatynyn aıtty.

«Búgin Memleket basshylary arasynda Qazaqstanda Qazaq-fransýz ýnıversıtetin ashý máselesi pysyqtalatyny málim etildi», - dedi Saıasat Nurbek.

Onyń sózinshe, atalmysh joǵary oqý orny Qazaq-alman ýnıversıtetiniń úlgisimen qurylýy múmkin.

«Biz jeke jumys tobyn quryp, máseleni sol alańda talqylaımyz. Sondaı-aq óńirlerdegi joǵarǵy oqý oryndarynda myqty fransıalyq ýnıversıtetterdi tarta otyryp, zertteý kafedralaryn ashý máselesin talqylaımyz. Fransıalyq ýnıversıtetterden kelgen delegasıalar da bizdiń elde júr. Búgin eki el rektorlarynyń forýmy bastalady. İs-shara Almaty qalasynda 3 kún boıy ótedi», - dedi mınıstr.

Eske salaıyq, Fransıa prezıdenti Qazaqstanǵa Memleket basshysy Qasym-Jomart Toqaevtyń shaqyrýymen keldi. Sapar aıasynda eki el basshylary saýda-ekonomıkalyq, ınvestısıalyq jáne energetıkalyq yntymaqtastyqty nyǵaıtý, sondaı-aq halyqaralyq jáne óńirlik kún tártibindegi máselelerdi talqylaıdy dep josparlanǵan.

Aıta ketý kerek, Prezıdent Qasym-Jomart Toqaevtyń Fransıaǵa byltyr jasaǵan resmı sapary aıasynda 35 qujatqa qol qoıylǵan bolatyn.

---