InfoHub Logo

Qazaqstandaǵy 5 ýnıversıtet álemdegi eń úzdik joǵary oqý ornyndarynyń tizimine enip otyr.

Elimizdegi joǵary oqý oryndary álemdegi eń ozyq ýnıversıtetterdiń qataryna qosylýda. Taıaýda álemdik QS reıtıńi kezekti nátıjesin jarıalandy.

Byltyr bul kórsetkishte qazaqstandyq 16 joǵary oqý orny kórinse, bıyl taǵy 5 ýnıversıtet úzdikter qataryn tolyqtyrdy.

Atap aıtqanda, QS World University Rankings – álemniń úzdik ýnıversıtetteri tizimine alǵash ret Dáýlet Serikbaev atyndaǵy SHQTÝ, Narhoz ýnıversıteti, Súleıman Demırel atyndaǵy ýnıversıtet, Qorqyt Ata atyndaǵy Qyzylorda ýnıversıteti jáne M. H. Dýlatı atyndaǵy Taraz óńirlik ýnıversıteti kirdi.

«Ǵylymnyń negizgi býyny óńirlik joǵary oqý oryndaryna daryp, el ekonomıkasy men ónerkásibin damytýda mańyzdy ról atqara bastady. Myqty ýnıversıtetter jergilikti ekonomıka men ındýstrıanyń damýyna jol bastaıtyn bilikti kadrlardy daıyndaıdy», - deıdi QR Ǵylym jáne joǵary bilim mınıstri Saıasat Nurbek.

D. Serikbaev atyndaǵy SHQTÝ jahandyq QS kórsetkishine ǵylymdy damytýǵa basymdyq berýiniń arqasynda enip otyr.

«Biz eń aldymen, ǵylymdy damytýǵa basymdyq berip, ǵylymı zertteýlerdi qarjylandyrýdy, tehnologıalardy komersıalandyrýdy jolǵa qoıdyq. Sondyqtan respýblıkalyq búdjetten ǵylymdy qarjylandyrý birneshe ese ulǵaıdy. 2021-2023 jyldary eki esege jýyq, 2023-2025 jyldary ǵylym búdjeti 3,5 esege ulǵaısa, jalpy qarajat 643 mlrd teńgege jetti. Bul bizdiń ǵalymdardy erekshe yntalandyryp otyr. D.Serikbaev atyndaǵy SHQTÝ jalpy tabysynda ǵylymnyń úlesi 20%. Bul álemdik joǵary oqý oryndary deńgeıinde», - dep habarlady bilim ordasynyń baspasóz qyzmeti.

---