InfoHub Logo

QR Bilim jáne ǵylym mınıstrligi epıdemıalyq ahýal jaqsarǵan jaǵdaıda dástúrli oqytý formatyna kezeń-kezeńimen kóshedi. Bul týraly QR Bilim jáne ǵylym vıse-mınıstri Sholpan Qarınova aıtyp berdi.

«Eń aldymen, bul jaǵdaıda balalar men pedagogtardyń, jalpy halyqtyń densaýlyǵyn eskerýimiz qajet. Bilim berý salasyndaǵy quzyrly organ retinde mınıstrliktiń sapaly bilim men balalardyń densaýlyǵy arasynda teńgerim tabýy qajettigin, oǵan jaýapty ekendigimizdi túsinemiz. Sanıtarlyq-epıdemıalyq ahýalǵa qaraı ár aımaqta oqytý formatyn aýystyrý boıynsha sheshim qabyldanady. Iaǵnı, jalpy respýblıka boıynsha ortaq bir sheshim qabyldanbaıdy. Barlyǵy sanıtarlyq-epıdemıalyq ahýalǵa baılanysty bolady», — dedi vıse-mınıstr «Atameken» UKP ótkizgen onlaın jınalysta.

Onyń aıtýynsha, mınıstrlik dástúrli oqytý formatyna kezeń-kezeńimen kóshý boıynsha jospar ázirlep qoıǵan.

«Eger sanıtarlyq jaǵdaı jaqsarsa, eń aldymen 1-5 synyptar oqý prosesine kirisedi. Bul ýaqytta 6-11 synyptar qashyqtan oqytylady. Jaǵdaı taǵy jaqsara tússe, 6-11 synyptar da shtattyq rejımge kóshiriledi. Mektepterde sanıtarlyq qaýipsizdik sharalary saqtalady», — dedi Sh. Qarınova.

---