InfoHub Logo

Aınagúl búgin balalarǵa jylqy jaıly sabaq ótken edi. Sabaq barysynda Aınagúldiń aýzynan, maǵynasyna oraı, jylqy degen de ataý aıtylyp jatty, at degen de sóz shyqty, Qambar ata túligi degen de sóz aıtyldy, tipti jylqynyń jas ereksheligine baılanysty aıtylatyn sózder de atalmaı qalmady. Ony bylaı qoıǵanda, Aınagúl júırikke baılanysty aıtylatyn tulpar, arǵymaq, sáıgúlik degen sózderdi de
retine qaraı qoldanyp baqty.

Aınagúldiń bir minezi sabaq berý barysynda óziniń shákirtterin tyńdaǵandy da jaqsy kóretin. Bul joly da solaı etpek boldy. Kenet synyptyń ortasynan Ernar degen bala qol kóterdi. Ernar Aınagúldiń súıikti shákirtteriniń biri edi. Sondyqtan ba ózin erkinirek ustaıtyn. Keıde apaıyna azdap erkelep qoıatyny da bar. Ernar bul joly salmaqty minezben ornynan turdy da:

- Apaı, - dedi. - siz bizge búgingi sabaqta jylqy týraly biraz maǵlumat berdińiz. Siz bizdiń ata-babamyzdyń asaýdy erttep mingenin, sol asaýdy erttep mingende taqymy bir sát bosańsymaǵan halyq ekenin jetkizdińiz. Áıtse de kókeıimde bir suraq tur. Sol ata-babamyz endi bir zamandar ótkende óz urpaǵynyń jylqyny tek sýretten ǵana kórip otyratynyn oılady ma eken?

Synyp tynshı qaldy. Aınagúl óz shákirtiniń ne aıtqysy kelip turǵanyn túsindi. Biraq shákirtiniń suraǵyna ázilmen jaýap qaıtardy:

- Ernar-aý, endi men synypqa jylqyny ákelip qoıa almaımyn ǵoı.

Balalar bul sózge jamyrasyp kúlip jiberdi.

- Árıne, ákelip qoıa almaısyz ǵoı, - dedi Ernar da ezý tartyp. - Tek siz áńgimelep jatqanda, osy oılar basyma keldi. Ózińiz aıtýshy edińiz ǵoı, balalar, pikir bildirgende irkilmeı sóıleýge úırenińder dep.

Synyp apaı ne der eken degendeı Aınagúlge kózderi jáýdiregen kúıi qarap qaldy. Kenet Aınagúl:

- Balalar, men qaı tilde sóılep turmyn? - dedi.

Sol-aq eken, shákirtter beıne bir hormen án salǵandaı jamyrasyp qoıa berdi:

- Qazaq tilinde sóılep tursyz, apaı. Ózimizdiń ana tilimizde sóılep tursyz.

Aınagúl balalardyń ózimizdiń ana tilimizde sóılep tursyz degenine tolqyp qaldy. Sondyqtan ba:

- Osyǵanda shúkir deńder, balalar, - degendi aıtqanda Aınagúldiń daýsyna diril aralasyp ketkendeı boldy. - Bizdiń tilimizdiń osy zamanǵa kelip jetip otyrǵanyna da shúkirshilik etý kerek. Ol zamandardyń qyspaǵynan ótti. Bul tilde bizdiń babalarymyz sóılegen edi. Men áli de babalarymyz sóılegen tilde sóılep turmyn. Men senderge osy tilde óz babalaryń erttep mingen sáıgúlikter men arǵymaqtar jaıly áńgimeni jetkize alyp turmyn. Men osy áńgimemniń ishinde "At - er qanaty" degen sózdi birneshe márte qaıtalaǵan edim. Endi sender meniń osy áńgimemnen tumardaı ǵana oı túıip, kókirek kózderińe syıǵyzyp ustaı alsańdar, senderdi keleshekke jeteleıtin ushqyr qanat sol bolmaq, - dedi Aınagúl.

Synyp tym-tyrys qaldy. Olar mynaý san-sapalaq aqparattar toǵysy oryn alǵan zamanda apaı aıtqan oımaqtaı oıdy sol tasqynnyń arasynda joǵaltyp almaı, qasıetti tumardaı qorǵashtap júreıikshi degendeı oılanyp qalǵandaı edi.

---