InfoHub Logo

Merekelik is-sharalarǵa baılanysty ótkiziletin baǵdarlamalardyń is-josparyn talqylap, bekitý úshin ujymda shaǵyn jınalys ótip jatyr edi. Jınalysty basqarýshy sóılep otyrǵan, kenet jańadan kelgen qyzmetker:

- Myna bir taqyrypqa kishkene ózgeris engizýge bolmaıdy ma? - dedi.

- Qaı taqyrypty aıtasyz? - dedi jınalysty basqarýshy.

- Myna "Tilim - tiregim" degen taqyrypty aıtamyn.

- Ol taqyryp sizge nesimen unamaı tur?!

- Sál jattandylaý estiletin sekildi. Kishkene ózgeris engizýge bolmaıdy ma?

- Nesi bar, áp-ádemi-aq taqyryp! - dedi jınalysty basqarýshy. - Biz jyl saıyn osy taqyryppen ótkizip júrmiz ǵoı.

- Tym bolmasa, eki sózdiń ornyn aýystyryp kórý de oılaryńyzǵa kelmedi me?

Jınalysty basqarýshy shoshyp ketti:

- Siz sóılem músheleriniń ornyn aýystyryp jibergennen keıin ne bolatynyn bilesiz be?!

- Ne bolady eken?!

Biraq eshkim de ne bolatyndyǵyn aıta almady.

- Al myna "Táýelsizdigim - tuǵyrym" degen taqyrypty she? - dedi jańadan kelgen qyzmetker.

- Ol taqyrypty ne dep ózgerteıin dep edińiz?!

- Tym bolmasa, "Tuǵyr ústindegi táýelsizdik" dep ózgertip kórmedińizder me?

- Qurmettim! - dedi jınalysty basqarýshy. - Siz tym tereńdep barasyz! Táýelsizdik tuǵyr ústinde turady ma, álde ózi birdeńege tuǵyr bolyp turady ma, ony sheshetin siz emes!

- Oǵan bola nesine abyrjısyzdar? - dedi jańadan kelgen qyzmetker. - Bul bar bolǵany merekelik is-sharalardyń taqyryby ǵoı. Sizderdi túsinbeı otyrmyn.

- Men de sizdi túsinip otyrǵan joqpyn! - dedi jınalysty basqarýshy. - Ol taqyryptarǵa nemenege shúılige qaldyńyz?! Biz jyl saıyn osy taqyryptarmen ótkizip júrmiz ǵoı. Áp-ádemi-aq ótip júr. Úlkender alda, jastar artta, qol shapalaqtaıtyn jerlerinde qol shapalaqtaıdy.

- Tym bolmasa, baǵdarlama jańa ándermen baıytylyp otyrar dep úmittenem.

- Joq! Óziniń taqyryptyq ánderi bar. Sol ánderdi aıtatyn bekitilip qoıylǵan ánshileri bar.

Jańadan kelgen qyzmetker aýa jetpegendeı qarmanyp baryp, jutyndy.

- Eń bolmasa, sol ánshiler ústerindegi kóılekterin aýystyryp otyratyn shyǵar?

- Eshqashan! Jyl saıyn sol bir kóılekpen shyǵady.

- Tamara apaıǵa qıyndaý tıip júr, - dedi áldekim. - Ol kisi tolyǵyp ketken. Qyz kúnindegi kóılegi tarlyq etip júr.

- Ol kisige jańadan kóılek tiktirý de oılaryńyzǵa kelmedi me?

- Odan birdeńe shyǵa qoıar ma eken? - dedi jınalysty basqarýshy. - Ol kisiniń ómirdegi eń uly muraty - sol ústindegi kóılegimen zeınet demalysyna shyǵyp ketý.

Jańadan kelgen qyzmetker basyn shaıqady.

- Siz bul jerge jańadan kelgen qyzmetkersiz, - dedi jınalysty basqarýshy. - Jańadan kelgen qyzmetkerge keıbir nárseler oǵash kórinýi múmkin. Alaıda bara-bara úırenip ketetin bolasyz. Áli-aq ózińiz de osy yrǵaqpen án sala bastaısyz.

- Sonymen is-sharalardyń taqyrybyn bekitemiz be? - dedi jınalysty basqarýshy. - Bekitilsin degenderińiz qol kóterińizder.

Bári qolyn kóterdi. Jańadan kelgen qyzmetker de qolyn kóterdi.

- Jaqsy, - dedi jınalysty basqarýshy. - Endi bastyqqa baryp bekittirip ala qoıaıyn.

- Eshteńeni ózgertip jibergen joqsyńdar ma? - dedi bastyq. - Bir jańalyq engizemiz dep, birdeńeden qatelesip ketip júrmeıik.

- Joq, Sáke! Eshteńeni ózgertken joqpyz. Bári de báz-baıaǵysynsha.

Qol qoıyp berdi.

---