Aıtsańshy, kóke-aý, qaı mańda,
Orny meniń úıimniń?
Qanyp eń talaı aıranǵa,
Qolynan ájem Tıynnyń.
Orny qaıda úıimniń?
Aıtsaıshy, kóke-aý, qaı mańda,
Mekeni týys, baýyrdyń?
Attanǵan óziń maıdanǵa,
Orny qaıda aýyldyń?
Qaı mańda, kóke-aý, qaı mańda,
Kórsetshi bizdiń kósheni?
...Pisheni pisken jaılaýda,
Sap-salqyn samal esedi.
Jurttaryn izdep qaýymnyń,
Ýaqyt biraz tekke ótti.
Ornyna eski aýyldyń,
Jońyshqa shyǵyp, kóktepti.
Atyzdarǵa aryq bop,
Ózgerip ketken jylǵa da.
Ózgeristerge qaryq bop,
Ózgermeı taý tur bir ǵana.
Qaı mańda edi?!
Qaı mańda?!
(Ekeýmiz birdeı ańyrdyq)
Eski jurt - qazir jaılaý da,
Jan-jaǵy shalǵyn, shabyndyq...

---