I
Eı, meniń saıran mekenim!
Adamǵa bermes eki ómir,
(Árıne, bolmas eki ólim)
Men senen erteń ketemin,
Aıdynyn qımas aqqýdaı,
Aınalyp ushyp, ótemin.
Sýyptap, birde jylynǵam,
Júgirgem, bir jyǵylǵam,
Jıyrma besimde uǵynǵam,
On alty jastyń ne ekenin.
Eı, meniń saıran mekenim!
Eı, jastyq, erdiń serti ediń,
Erke ediń, erdiń serti ediń,
Lapyldap turǵan órt ediń,
Qanshama jandy jylytyp,
Qanshama jandy órtediń?
Aryma, meniń aıaýlym -
Elýge tolar erteńim!
Jaýqazyn ǵumyr, jyr-jastyq,
Qanshada bizder qyr bastyq,
Qanshama ret qar jaýdy,
Qaıtadan bizdi turmas qyp?!
Sonda da bizder jyrlastyq,
Sonda da bizder syrlastyq,
On segiz benen otyzdy,
Ózara bólip, qurdas qyp.
Qanshama qystan ótpedik,
Qanshama ret kóktedik?!
Erkesi boldyq biz eldiń,
Esersoq bolyp ketpedik.
Qıandy qalap, sheptegi
Qıyndyqtarǵa bettedik.
Er synalar maıdanda,
Enshimizge dóp kelip,
Qanshama qyrshyn ketti ólip.
Aqıqat deıtin aýyldyń,
Qasynan dáıim tabyldyq.
Aýyrdan saýyt jamyldyq,
Sonda da bizdi jaýyr ǵyp,
Joǵalta almady aýyrlyq.
Bir birimizdi baýyr ǵyp,
Sonda da bizder saǵyndyq.
Oshaǵy sóngen úılerdiń
Oty boldyq ta, jaǵyldyq.
Mahabbatqa da sengenbiz,
Ǵashyq ta bolyp kórgenbiz.
Baıany bar aýylǵa
Qozy bolyp ta kelgenbiz.
Esersoq bolyp ketpedik,
Erkeleı bildik elge biz!

II
Eı, meniń nurly ǵumyrym!
Jastyǵym, móldir-tunyǵym,
Eı, meniń qyzdaı qylyǵym!
Tógilip jibek tulymyń,
Boıydy basyp burymyń,
Qaı jerde júrsin, qulynym?
Qaı jerde júrme, qaı mańda,
Qanatyn kóktem jaıǵanda,
Saıranda, janym, saıranda!
Tunyp qal túpsiz qaınarda,
Qaýlaı jet qyrqa, saılarǵa.
Jalaýly jastyq maıdanda,
Jabyǵa kórme, jaırańda,
Saıranda, janym, saıranda!
Eı, meniń shýaq kóktemim!
Kóktemim - qımas ótkenim,
Eı, meniń qıyn ótkelim,
Qınalmaı qalaı ótkenmin?!
Qalaı da qalaı ketkenmin?!
Qyryqqa qalaı jetkenmin?!
Saıaly baqty bókterim,
Saıańnan ketem dep pe edim?!
Eı, meniń qıyn ótkelim,
Qýanyshym da kóp meniń
Ókinishim de kóp meniń!
Shyt kóılek...
Belin bir búrgen,
Etegin jelge ildirgen,
Omyraýyńda búldirgen,
Qasyńdaǵy qarlyǵash.
Keterin ushyp kim bilgen?!
Qaryndas edi bir júrgen,
Qaı jaqqa ketip úlgirgen?!
Qaı jaqta meıli júrmesin,
Baqytty bolǵaı irgesi,
Baqytty bolǵaı...
Óz úıi -
Óziniń bolmaı túrmesi,
Áıteýir jylap júrmesin,
Muńlyq bop ómir súrmesin
Bosaǵa attap, kirgesin...
(Qashanda, Janym birgesiń!!!)
Qashanda kóktem kelgende,
Turasyń kóktep sen - mende,
Jarylmaı jatqan jaýqazyn,
Týlaıdy meniń keýdemde,
Kóktemdi mynaý kórgende,
Qabirimdi qaq jaryp, shyǵarsyń sen...
Eı, meniń qıyn ótkelim!

---