InfoHub Logo

Bilim jáne ǵylym mınıstri Ashat Aımaǵanbetov Facebook-paraqshasynda ǵylymı kadrlardy daıarlaýdy jetildirý máseleleri jóninde aıtty.

Mınıstrdiń aıtýynsha, ǵylymı qyzmettiń negizgi nátıjelerin jarıalaý úshin Bilim jáne ǵylym salasyndaǵy baqylaý komıteti usynǵan ǵylymı basylymdardyń tizbesine kiretin jýrnaldarǵa qoıylatyn talaptardy ózgertý bóliginde QR Bilim jáne ǵylym mınıstrliginiń №20 buıryǵyna ózgerister engizý týraly buıryq jobasy ázirlenip, sheshim qabyldanǵan.

«Búginde oǵan kontenttiń joǵary sapasyn árdaıym qamtamasyz ete almaıtyn belgili bir ólshemder boıynsha iriktelgen 177 otandyq basylym kiredi. Osyǵan baılanysty, biz Scopus jáne Web of Science sıaqty derekter qorynyń talaptaryna sáıkes osy jýrnaldarǵa qoıylatyn talaptarymyzdy beıimdeý boıynsha jumysty bastadyq.

Bul, mysaly, qosarlanǵan jasyryn resenzıalaý, anyq redaksıalyq saıasat, qabyldanǵan maqalalardyń jýrnaldyń taqyryptyq baǵytyna sáıkestigi, sheteldik resenzentter, barlyq jarıalaý úrdisiniń transparenttiligi, kúshti redaksıalyq alqa, avtorlyq quqyqty qorǵaý jáne t. b.Osy talaptar 1-1,5 jyl ishinde kezeń-kezeńmen osy tizbege kiretin barlyq otandyq ǵylymı jýrnaldarǵa qoldanylady.

Osy oraıda basylymdardyń sany qysqarady dep kútilýde, sapaly kontent úshin básekelestik artady jáne bul jalpy alǵanda halyqaralyq deńgeıdegi ǵylymı basylymdardy shyǵarýdyń kásibı akademıalyq mádenıetin qalyptastyrýǵa qyzmet etedi», - dep jazady mınıstr facebook paraqshasynda.

Ashat Aımaǵanbetovtyń aıtýynsha, mınıstrlik Scopus jáne Web of Science halyqaralyq bazalarynyń qataryna enýi tıis birqatar ǵylymı jýrnaldardy qarjylyq qoldaýǵa konkýrs jarıalaýdy josparlap otyr. Kóbinese otandyq ǵylymı jýrnaldardyń JOO men ǵylymı uıymdardyń basshylary nazarynan tys qalyp jatatyndyǵy qupıa emes, keıbir jerlerde qarjylyq qoldaý jetkiliksiz. Mınıstrlik tarapynan jekelegen jýrnaldardy irikteý jáne qoldaý olardyń sapasy men bedelin arttyrýǵa múmkindik beredi.

«QR BǴM №127 buıryǵyna sáıkes, doktorantqa qorǵaýǵa shyǵý úshin mindetti túrde 7 maqala jarıalaý kerek, bul rette sapasy boıynsha erekshe talaptar qoıylmaıdy.

Nátıjesinde basty nazar tek sandyq kórsetkishke aýdarylyp, maqalalar sapasy kúmándi jýrnaldarda jarıalana bastaıdy. Keıin ǵalymdarymyzdyń maqalalary halyqaralyq bazalardan shyǵarylǵan belgisiz bir jýrnaldarda basylyp shyqqanda tań qalyp jatamyz. Álbette, qalyptasqan bul dástúrdi ózgertý kerek. Iaǵnı, suranysqa ıe emes «álsiz» jýrnaldarda maqalalardyń kóp jarıalanýyna qaraǵanda, bedeldi jýrnaldarda sapaly jarıalanymdar az shyqqany jaqsyraq dep anyq aıtýǵa bolady.Degenmen, bar erekshelikti eskere otyryp, áleýmettik-gýmanıtarlyq ǵylymdardyń damý deńgeıine sáıkes keletin gýmanıtarlyq jáne áleýmettik mamandyqtar úshin jekelegen talaptar qalyptastyrylatyn bolady», - deıdi ol.

Sonymen qatar, magıstrlik jáne doktorlyq dısertasıalar jetekshilerine qoıylatyn talaptar da ózgeredi.

---