InfoHub Logo

Zańger-oqytýshy biliktiligi boıynsha ózi ádebıetti oqyǵan oqý ornynan 4 jyl oqyp ekinshi ret joǵary bilim alyp shyqqannan keıin, ádebıetpen birge mekteptegi quqyqtaný páninen de sabaq bere bastaǵan edi. Endi osy pánnen ǵylymı joba daıyndatqan shákirtin aýdandyq ǵylymı jobalar jarysyna alyp barýy kerek. Byltyrǵy daıyndaǵan shákirti aýdandyq ǵylymı jobalar jarysynan ótip, odan ári oblystyq ǵylymı jobalar jarysyna qatysyp qaıtqan bolatyn. Ol quqyqtaný boıynsha aýdan oqýshylary arasynan oblystyq ǵylymı jobalar jarysyna qatysqan tuńǵysh shákirt edi. Júldeli orynǵa ilige almady. Buǵan jumystaǵy qatelik sebepshi boldy. Al myna aýdandyq ǵylymı jobalar jarysyna daıyndap alyp barǵaly otyrǵan shákirti - ekinshi shákirti.

Qys ortasynda jaýǵan jańbyr kólik qozǵalysyn shektep tastaýyna baılanysty, bular aýdan ortalyǵyna tek tús áletinde ǵana jete aldy. Bul kezde aýdandyq ǵylymı jobalar jarysy qorǵalyp ketken edi. Ádisker munyń ne sebepti keshigip kelgenin surap alǵannan keıin: "Biz túske deıin quqyqtanýdan túsken ǵylymı jobalardy qarap shyqtyq. Bıyl da oblystyq ǵylymı jobalar jarysyna senderdiń jumystaryń barady dep uıǵardyq. Sondyqtan shákirtińdi oblysqa daıynda", - dedi. Bul osy kezde ádiskerden óziniń taǵy bir shákirtiniń ǵylymı jobasy bar ekenidign, sol jumystyń jaǵdaıy ne bolǵanyn surady. Ádisker ol jumystyń ádebıetten jazylǵan ǵylymı joba jumysy ekendigin, al aýdanda ádebıet seksıasy joq ekenin, ózine qarasty tarıh jáne quqyqtaný seksıasynda ol jumysty qaraı almaıtyndyǵyn aıta kele: "Eger ol jumysyńdy alǵyń kelse, apaıyńnyń seıfinde tur", - dedi. Apaı dep otyrǵany aýdandyq bilim bóliminiń jaýapty mamany edi. Apaıyna jolyqty. Apaıy: "Seniń ol jumysyń mende tur. Bıyl da quqyqtanýdan oblysqa sen bara jatsyń ǵoı, endeshe, osy jumysyńdy da qosyp ala ket. Múmkin oblys qarap, baǵasyn berer", - dedi.

Sanaýly kúnderden keıin ádebıet pen quqyqtanýdan ǵylymı joba qorǵaıtyn eki shákirtin ertip, oblystyq ǵylymı jobalar jarysyna barý úshin bular poıyzǵa otyrdy. Bul joly quqyqtanýdan qorǵaǵan shákirtiniń "Musylmandyq quqyq jáne onyń qoldanystaǵy quqyqtan uqsastyǵy men aıyrmashylyǵy" atty ǵylymı joba jumysy oblystan arnaıy marapat qaǵazyn aldy. Al ádebıetten qorǵaǵan shákirti II orynǵa ıe boldy. Kóp uzamaı ekinshi oryn alǵan jumys Astana qalasyna irikteý kezeńine joldandy. Arada ýaqyt ótkende, jumystyń irikteý kezeńinen ótip, respýblıkalyq ǵylymı jobalar jarysyna qorǵaýǵa usynylǵandyǵy habarlanǵan edi.

Úsh kúnge sozylǵan respýblıkalyq ǵylymı jobalar jarysynda shákirt óz jumysyn nátıjeli qorǵady. Qazaly aýdany, №25 orta mektebinen qatysyp otyrǵan shákirttiń "Halyq aqyny Baınazar Ótepov shyǵarmashylyǵyndaǵy el taǵdyry jáne aqyn óleńderiniń kórkemdik máni" atty ǵylymı joba jumysy respýblıkalyq ǵylymı jobalar jarysynyń II ornyna ıe boldy. Bul jumys aýdan oqýshylary arasynan ádebıetten tuńǵysh ret jazylyp, respýblıkada qorǵalǵan oqýshynyń ǵylymı joba jumysy edi. Al shákirt óz mektebinen respýblıkalyq bilim báıgesine - ǵylymı jobalar qorǵaý jarysyna - tuńǵysh ret qatysqan shákirt boldy.

Marapattaý rásiminen shyǵyp kele jatqanda, shákirt qyzdyń: "Myna kisiler ǵoı keshe bizge ǵylymı joba qorǵatqan", - degen sózinen bularǵa nazar aýdarǵan, ózin fılologıa ǵylymdarynyń kandıdatymyn dep tanystyrǵan er adam: "Keshe kórdik qoı jumystardy qorǵatqanda, jumys jaqsy jazylǵan, shákirt te qabiletti eken", - dedi. "Sińlim, - dedi ekinshi maman shákirt qyzǵa qarap. - osyndaı jumystardyń izine túse berseń qaıtedi, arab jazýyn úırenip al, keıbir kóne qoljazbalar arab qarpimen jazylǵan ǵoı".

Aýdandyq bilim bóliminiń basshysy buǵan keterinde "qaıtarda soǵyp, maǵan nátıjeńdi habarlaı ket" degen edi. Bulardyń respýblıkadan II oryn alyp kele jatqanyn estigende qýanyp qaldy. "Bul - biz úshin úlken jetistik", - dedi.

Arada ýaqyt ótkende, shákirt qyz: "Bul jumys meniń mamandyq tańdaýdaǵy maqsatyma ózgeris engizip jiberdi. Men buryn únemi mektepte tarıh páninen pán olımpıadasyna qatysyp kelgen edim. Ózimdi bolashaq tarıh mamany retinde daıyndap júrgenmin. Endi men osy jumystan keıin ádebıettiń mamany bolǵym keledi", - dedi.

Birde ustazdardyń eńbek demalysy kezinde qaladaǵy úıge kenetten quqyqtanýdanǵylymı joba qorǵatqan shákirt ulynyń kirip kelgeni. Ol buǵan: "Men mektepti byltyr bitirdim ǵoı. Oqýǵa túse almadym. Endi taǵy testke qatysyp kórsem depedim. Úıde jatyp daıyndalýyma bolama? Meniń testke daıyndyǵyma kómektesińizshi. Men bolashaq dáriger bolǵym keledi", - dedi. Shákirt sol joly dárigerlik mamandyqtyń grantyna oqýǵa túsip ketken edi. Ol birde taǵy da úıine kelip óziniń osyndaǵyúlken bir aýrýhanada aýyr jaǵdaıdaǵy naýqastarǵa kómek kórsetetin dáriger ekendigin aıta kele: "Sizge raqmet, kezinde meniń daıyndyǵyma kómektesip edińiz. Endi dáriger bolyp, sol oqýymnyń nátıjesin kórip júrmin", - dedi. "Baıaǵyda ǵylymı joba qorǵaǵanyń esińde me?" - dedi bul. Dáriger kúldi:

"Esimde ǵoı, nege esimde bolmasyn. Ǵylymı joba qorǵap, oblystan marapat qaǵazyn alyp qaıtqan edim ǵoı".

---