Google Pay degenimiz ne jáne qalaı tóleımiz?

Google Pay degenimiz ne?

Google Pay — bul dúkenderde, saıttarda jáne mobıldi qosymshalarda satyp alý tólemderin smartfon arqyly júzege asyrýǵa múmkindik beretin qyzmet. Google Pay-di kontaktisiz tólem termınaly ornatylǵan kez kelgen jerde qoldana alasyz. Google Pay arqyly tóleý úshin smartfondy kartamen birge osyndaı termınalǵa jaqyndatyp ustaısyz. Sonymen qatar, smartfonǵa birneshe kartany tirkeýge bolady.

Al endi onlaın satyp alýlarǵa toqtalsaq, Google Pay arqyly tólem qabyldaıtyn saıttar men mobıldi qosymshalarda osy servıstiń logotıpi ekran betinde kórsetilip turady, sonyń ústinen basyp ári qaraı aqsha tóleı alasyz. Bul ásirese saıttarda onlaın tólem jasaǵanda ár kez saıyn karta derekterin qaıta-qaıta engizip otyrý qajettiligin joıyp, prosesti jeńildetedi.

Google Pay qyzmeti qandaı qurylǵylarda qoljetimdi?

Google Pay qyzmetin smartfonyńyzda operasıalyq júıe Android 5.0 nemese odan joǵary bolsa ornata alasyz. Al ony bilý úshin "Qondyrǵylar" (Nastroıkı) bólimine kirip, "Telefon týraly" degen jerden smartfonyńyzda Androıd operasıalyq júıesiniń neshinshi nusqasy turǵanyn bile alasyz. Sonymen qatar, termınal arqyly tólem jasaý úshin telefonyńyzda NFS tehnologıasy bolýy kerektigin de atap ótemiz.

Dúkenderde saýda jasaǵan kezde, Google Pay satýshyǵa sizdiń kartańyzdyń nómirin bermeıdi, sondyqtan tólem derekteri tolyqtaı qorǵalǵan dep aıta alamyz. Al eger telefonyńyzdy joǵaltyp nemese urlatyp alǵan jaǵdaıda Google akkaýntyńyzdaǵy "qurylǵyny tabý" (naıtı ýstroıstvo) fýnksıasy arqyly qashyqtyqtan barlyq derekterdi buǵattap nemese joıa alasyz.

Google Pay qyzmetin qalaı qoldanamyz?

Bul úshin birneshe qarapaıym qadamdar jasaý kerek:

1. Play Market-ten Google Pay mobıldi qosymshasyn júkteısiz.

2. Google akkaýntyńyzǵa kirip, tólem jasaý ádisi degen jerge seriktes banktiń Visa nemese Mastercard nesıelik nemese debettik kartany engizesiz.

3. Dúkenderde Google Pay qyzmetin paıdalaný úshin telefonyńyz NFC qoldaıtynyna kóz jetkizip alyńyz.

4. Sondaı-aq, kartany Google Pay-ge tikeleı banktiń mobıldi qosymshasynan da qosýǵa bolady. Alaıda bul tek osy servıspen seriktes bankterdiń qosymshalary úshin qoljetimdi.

Búgingi tańda Google Pay Qazaqstanda Visa jáne Mastercard kartalarymen jumys isteıdi, al seriktesteri qatarynda 10 bank bar. Atap aıtsaq, Halyk Bank, ForteBank, Eýrazıalyq bank, Neobank Simply, Álfa-Bank, Hoým Kredıt Bank, Bank RBK, Bank SentrKredıt, Sberbank, Jusan Bank. Jalpy, kontaktisiz termınal bar barlyq jerde Google Pay arqyly tóleýge bolady. Al mundaı núkteler sany elimizde 200 myńnan asady.