InfoHub Logo

Serke – kósem. Borandy kúnde adýyn kúshke tótep bergen tól basshy. Qazaq kóginde bir-aq ret jarq etti. Shoqtyǵy bıik juldyz edi. Onsyz bizdiń aspan suńqıyp qalǵandaı. Zamana ótti. Eske alyp, esirkeıtin sát jetkendeı. Joq, álde syr sandyǵyn aqtaratyn kez be? Arasyn alystatpaı-aq, ekeýin de qozǵasaq jarar. Kórer kóz, oqyr jan bolsa...

Taǵdyrdyń tarpań jolyna túsken esil er. Dúmpý týdyrǵan dúnıe. Bul túzýler «Oıan, qazaq» atty ortaq núktede qıylyssa, Serkeniń birer kúndik ǵumyryn baıandaýǵa shaq keler. Patsha aǵzamdy túıreseń, túıininde óziń japa shegesiń. Gazettiń aqtyq demi «Bizdiń maqsatpen» úzilse kerek-ti. Naqtyraq, Mirjaqyp Dýlatulynyń muratymen. Al ol neni kóksedi? Halyqtyń kem-ketigin bútindeýdi. Tym bolmasa, barynan aıyrmaýdy. «Qazaǵym meniń, elim meniń»,-dep ún saldy. Reseıge táý ete «táýba» qylǵan táýeldilikti meńzedi. Otar ekenimizdi quqyq joqtyǵymen aıǵaqtady. Munyń bári yza men kekke septeýdeı.

Búgin de úkimet tarapynan qarjynyń «qaıda?», «nege?» jumsalǵanyn bilip bolmaısyń. Baǵzy zamanda she? Mirjaqyp ata, bilip aıtqan. Esh qajetsiz dúnıege shyǵyndalǵan bılik ókilderiniń qalyń buqaraǵa kómek qolyn sozýy ekitalaı. Ózindeı bas kótererler Peterbýrǵa attansa, mınıstrlikterden jóni túzý jaýap almaıtyny taǵy bar. Mınıstrler taǵaıyndaǵan qyzmetshilerdiń de maqsuty basqa. Qazaq saharasynyń tórinde taırańdaý. Baıaǵynyń ýrádnıgi men strajnıgi qazirgi ákimderdiń keskinine saıady. Kóregendik emeı, ne?!

Mal-múlik tirini tirnektetse, rýhanı ómir aıasy aıalaı túsedi. Muny shektegen chınovnıkterdi qaıpeksiń? Aýzynan jyryp asyn aldy. Kóndik. Eń asylyn dinin tyıdy. Tynshymadyq. Biz taqyr kedeılikten úrkektemedik. Ózdik bolmystan ajyraýdan shoshyndyq. Aqyry, áreń-máreń degende bostandyqqa jettik. Qandaı qunmen? Júrekke qadalǵan tikenmen...

Shúńirek kóz mujyqtardyń jer aýdarýy ahýaldy shıelenistirdi. Tirshiligimiz turalap qaldy. Sonda Reseı qursaǵynyń tar bolǵany ma? Joq, ol prezentterin shetqaqpaılatpas. Kerisinshe, shetke ysyratyn baı-shonjar tabylar. Jerimdi bermeımin. Alaıda, qazaqtan úlesiń tıedi. Bundaıda «Qyzyl jebe»-degi: «Bólip al da, bıleı ber»,-úzindisi eriksiz oıǵa oralady. Já, bul bólek jaıt. Búgin she? Qazaqstanǵa ózge ulttyń kóptep aǵylýy kezdeısoqtyq pa. Nege qany qazaq, jany qazaq qandastar qaıtpaıdy?...

Qarap tursań kem dúnıe bitpeıdi. Bútindigine birlik jetispeıdi. Jumylǵan judyryq bolmasań da, shashyrama qazaǵym!

Aǵybaeva Arýjan Orazqyzy

---