InfoHub Logo

Sıfrlyq tehnologıa kún saıyn damý ústinde. Bul ózgeris jýrnalısıka salasyna da áser etpeı qoımady. Burynǵydaı tek teledıdardan kóriný bilikti maman úshin azdyq etedi. Osy talapqa saı oqý oryndary da óz tizimine jańa mamandyqtardy qosty. Bir-birinen erekshelený úshin bilim júıesine túrli ózgeris engizip jatyr. Al HATÝ-da jýrnalısıkada oqýdyń qandaı erekshelikteri bar?

Bilim júıesi jańa formatta. 2-3 saǵattap leksıany tyńdap, oqytýshynyń sózine ilesip konspekt jazý degen túsinik múlde joq. Aıtylǵan aqparattan keregin túrtip alý stýdentke jaqsy. Biraq eshkim qoljazbalardy mindettep suramaıdy.

Sonymen qatar, teorıadan góri praktıka kóp. Stýdentterge tek teorıany jatqa aıtyp turýdy emes, durys baǵyt berý arqyly tájirıbe jınaýǵa múmkindik beredi. Mysaly, birinshi kýrstyń ekinshi jartysynan bastap qolǵa mıkrofon ustatady. Osylaısha sújet túsirýdi, reportaj jasaýdy úırenip shyǵamyz.

Ár stýdenttiń pikirimen sanasý. Oqytýshylar kez-kelgen bilim alýshynyń oıyn tyńdap, ózin tulǵa retinde sezinýine múmkindik beredi. Ásirese, bolashaq tórtinshi bılik ókilderiniń álem jáne eldegi jańalyqtarǵa degen kózqarasyn únemi surap otyrady.

Oǵan qosa jumysqa turý múmkindigi de kóp. Bakalavrdy bitirgen jýrnalıs zaman talabyna saı, jan-jaqty maman bolyp shyǵady.Túrli aqparattyq portaldar jáne respýblıkalyq basylymdarmen iskerlik kelissóz jasalǵan. Osynyń nátıjesinde, aǵa-ápkelerimiz bedeldi jumys oryndarynda óz qyzmetin joǵary deńgeıde atqaryp jatyr.

Bul meniń eki aı ishinde baıqaǵan jańashyldyqtarym. Tórt jyldyń ishinde áli talaı nársege kóz jetkizýim ábden múmkin. Oqyrmannyń suranysyn qanaǵattandyra alatyn BAQ ókili bolý bizdiń mindet. Kúndelikti aınalamyzda bolyp jatqan ózgeristerge ilesip otyrý ár salanyń mamany úshin úırenshikti nársege aınalǵany jón.

Baný Ábdiǵalıeva
HATÝ stýdenti

---