Jaramsaq bulaq baryp quıdy qumǵa,
Qum oǵan bulǵaǵan joq quıryǵyn da.
Ras qoı «Sý aıaǵy - qurdym» degen,
Qum qaıtsin jaramsaqtyń syılyǵyn da.
Tal janasar jaǵynyp, terekke kep,
Tamyry álsiz tal baıǵus...
Terek bólek.
Jaǵynýdan jatady jer ekpelep,
Jaǵynýlar biraq ta kerek... kerek...
Terek baıǵus nesine jaǵynady?!
Jaǵynatyn nárse izdep ańyrady.
Sybyrlaıdy jaǵympaz samal kelip:
- Jaǵyna bil, jaǵynsań,- tabylady.
...Daýyl-doly urynar emenge kep:
- Asqaqtamaı ıilgin tómenge! dep.
Arasynda arpalys bastalady,
Sebebi, daýyl bólek,
Emen bólek.
Emen tek jerge ǵana bas urady!
Daýyl ony kúndeıdi, ashynady.
He emendi qulatyp basylady.
He quıryǵyn qysady, qashyp áli...
Bir kempirdi bir kempir
Apa degen kún keshtik.
Bir balany bir bala
Ata degen kún keshtik.
Qýanyshty arman ǵyp,
Qapamenen birge óstik.
Egiz-egiz eldesip,
Qol ustasyp beldesip,
Qaırattanyp, kel desip,
Týǵan jerde keń besik,
Ómir súrdik selbesip.
Buǵanamyz qatpastan,
Býynymyz dat basqan.
Soǵys degen soıqan kep,
Tapyl turyp, tap basqan,
Bala shaqty ap qashqan.
Bile jatar bilgender,
(Bilmegender, bilmender...
Nardyń júgin kóterdik,
Botalar men ingender.
Qatar júrip qaıǵy, arman,
Jeńis kúttik maıdannan,
Er edik biz, er edik
Erte týyp, jaı qalǵan.
Tabıǵat,
Janymdy alsań,
Alshy meniń.
Bir túıir jerge túsken tamshyń edim.
Muqaǵalı joǵalsa qaıter deısiń
Artymda qalsyn jerim,
Qalsyn elim.
Men de bir júrip ketken saǵymdaımyn,
Qaldyr dep,
Saǵan, sirá jalynbaımyn,
Máńgilik mekenime jetý úshin,
Kúnine qanshama ret adymdaımyn.
Kim bilsin,
Qanshama áli shyrqarymdy,
Kim bilsin,
Qaı kúni sen qyrqaryńdy.
Muqaǵalı joǵalsa qaıter deısiń,
Joǵaltpasam bolǵany urpaǵymdy.

---