InfoHub Logo

Ianvardiń 29-y. Kún ashyq. Eki-úsh gradýs jylylyq. Qar azdap erip, úıler shatyrlarynan tamshylar sorǵalap aǵyp, burysh murjalarynyń túbindegi muz tóbeshelerin jýyp, shaıqap jatyr.

Meniń basymda sýsar bórik, ústimde kók eltiri jaǵaly keń bıkesha, aıaǵymda kók máýiti býrka - etik.

Sovet mınıstrovtyń polıklınıkasyndaǵy doktordan ómirimde estimegen sózderdi estip: «E, ol maǵan jasyńyz kelgen kisisiz ǵoı birneshe ret aıtty. Demek, jeńgeılerge qyryndaýdan shabandap júrsiń degeni ǵoı», — dep doktordyń sózderin kóńilime qatty alyp, ıyǵym tómen túsip, úıge «kempir qaıdasyń» dep kele jatyrmyn.

Dzerjınka men Komsomol kóshesiniń buryshyndaǵy sút magazıniniń buryshyna jaqyndaı bergenimde, tapa muz jaltyrap jatqan buryshtan ústinde qundyz jaǵaly paltosy bar, suńǵaq kelgen bir sulý kelinshek shyǵa keldi. Men oǵan qaradym. Ol maǵan qarady. Myna murty túksıgen, qazaqsha kıingen shal kim bolar eken degen kózben qarap, eki-úsh qadamyn aıaq astyna qaramastan kerbezdene basty da, muzǵa taıyp, maǵan jaqyndaı bergende jalp etip qulap tústi...

Men sasqalaqtap, aıaq astyma qulaǵan kelinshekti qoltyqtaı kóterip, ornynan turǵyzdym... Men kútken «Raqmet aǵaı» joq!

— Qaraǵym-aý! Eldiń kózinshe jalp etip qulaýdan kóri, ózime aıtsań da túsiner edim ǵoı! — dedim men oǵan.

Qazaqsha jaqsy biletin kelinshek bolýy kerek — qyzara janyp ol tura kep jóneldi.

Kempirime sony aıtamyn dep pálege qaldym.

---