InfoHub Logo

Jýyrda «Qazposhta» AQ-nyń bastamasymen elektrondyq saýdaǵa arnalǵan Visa jáne MasterCard kartalary aınalymǵa shyǵarylady. Bul óz kezeginde álemdik qarjylyq qyzmetterdi tutynýǵa jaǵdaı jasaıdy, - dep habarlady «Qazposhta» AQ Basqarma tóraǵasy Sáken Sarsenov óziniń Facebook paraqshasynda.

«Jaqynda biz Visa men MasterCard halyqaralyq tólem júıeleri boıynsha halyqaralyq sertıfıkattaýdy aıaqtadyq. Bul bizge jahandyq tranzaksıalar men qyzmetterdi paıdalanýǵa múmkindik beredi. Aldaǵy ýaqytta turǵyndarǵa sapaly qyzmet kórsetý úshin bul baǵyttaǵy jumystarymyzdy jalǵastyra beretin bolamyz», – dedi S. Sarsenov.

Al álemdik poshta odaǵy elimizdiń elektrondyq komersıaǵa daıyndyǵyn joǵary deńgeıde dep baǵalady. Buǵan poshta jelisindegi sıfrlyq tehnologıalardyń keńinen qoldanylýy yqpal etse kerek.

«Biz búkilálemdik poshta odaǵynyń (BPO) ókilderimen kezdestik. Olar Shyǵys Eýropa, Kavkaz jáne Ortalyq Azıa elderindegi poshta operatorlaryna kómektesedi. Iaǵnı, «Elektrondyq saýdaǵa jedel daıyndyq» jobasy úshin modernızasıalyq óndiristik prosesterdi júzege asyrý maqsatynda járdemdespek. Qazirgi tańda búro qyzmetkerleri Qazposhtanyń e-kommersıaǵa daıyndyǵyna baǵa  berdi. Olar bizdegi jóneltim sýpermarketi, sıfrlyq keńselerimizdi jáne drondar arqyly korespondensıalaý atty jobalarymyzdy joǵary baǵalady», – deıdi  «Qazposhta» AQ Basqarma tóraǵasy.

Onyń aıtýynsha, Almatydaǵy «MOSKVA metropolitan» atty saýda-oıyn-saýyq ortalyǵynda elektrondy kasır jumys isteýde. Munyń qyzmetimen kartalardy paıdalanýǵa, iri kólemdegi qarjylardy aýdarýǵa bolady.

Aıta keteıik, Qazaqstandaǵy e-kommersıa jyl saıyn 30 paıyzǵa artyp keledi. Onlaın-saýda arqyly el turǵyndary kóbine densaýlyqqa qajetti taýarlardy, turmystyq jıhazdardy, tehnıka men elektronıkany, balalarǵa arnalǵan oıynshyqtardy satyp alady eken.  Bir qyzyǵy – áıelder qaýymy erlerge qaraǵanda 8 esege artyq onlaın-saýda jasaıdy eken. Al álemdik zertteýshiler bolsa elimizdegi tutynýshylardyń 70 paıyzy mobıldik qurylǵylardan kiretinin alǵa tartyp otyr. Al bul kórsetkish Ýkraınada – 43 paıyz, Belorýsıada – 35 prosentti quraıdy.

---