InfoHub Logo

Jaqynda Almatyda «Qazposhta» AQ-nyń elimizdegi eń úlken sálemdemeler sýpermarketi ashylyp, qala turǵyndaryna demalyssyz qyzmet kórsetýde.

Áýezov aýdanynda ornalasqan bul fılıaldyń kólemi 1180 sharshy metrdi quraıdy. Atalmysh bólimshe 200 myńnan asa adamǵa qyzmet etýge arnalǵan. Ondaǵy qyzmet túrleri de kópqyrly. Máselen, nesıe berý boıynsha qyzmet kórsete alady, turǵyn-úıdiń kommýnaldyq tólemderin tóleýge bolady. Sondaı-aq, zeınet jasyndaǵylar zeınetaqysyn alsa, boryshkerler ótemaqyn tóleı alýlaryna múmkindikteri bar.

«Osy bólimshe 230 myńnan astam turǵynǵa qyzmet usynady. Aı saıyn bul sýpermarket 30 myńnan asa adamǵa ózderiniń joldamalaryn jiberedi. Sálemdemeler sýpermarketi arqyly nesıe alýǵa, komýnaldyq tólemderdi tóleýge, ótemaqylaryn óteýge, zeınetaqysyn alýǵa bolady», – deıdi «Qazposhta» AQ Almaty qalalyq fılıaly «Almatypochtamt» dırektorynyń orynbasary Nurdáýlet Qabylov.

Mundaı sýpermarketterdiń ashylýy – poshta jóneltimderin jedeldetýge jańa serpin berip, kompanıanyń óndiristik shyǵyndaryn ońtaılandyrýǵa jaǵdaı jasap jatyr.

«Orta aılyq kórsetkish boıynsha 32 myń poshtalyq jóneltim jiberýge qaýqarly. Al kún saıynǵy kelýshilerdiń sany shamamen 900-1100 adamdy quraıdy», – dedi «Qazposhta» AQ bıznes jónindegi basqarýshy dırektory, basqarma múshesi Azat Mashabaev.

Onyń aıtýynsha, qazirgi tańda Qazaqstanda 186 sálemdemeler sýpermarketi jumys isteıdi. Jóneltim prosesindegi mundaı format búginde qoldanýshylardyń yqylasyna bólenip úlgergen. Aǵymdaǵy jyldyń sońyna deıin taǵy da 4 úlken sálemdemeler sýpermarketin ashý josparlanyp otyr.

Kez kelgen tutynýshy óz taýarynyń kelgen-kelmegenin telefonyna jiberilgen habarlama arqyly bile alady. Ol úshin operatorǵa nebári jeke kýáligi, taýardy jáne telefon nómirin usynsa jetkilikti. Sondaı-aq, ol taýaryn ózine qolaıly ýaqytta alyp ketýine bolady.

Aıta keteıik, elimizidegi eń alǵashqy sálemdeler sýpermarketi 2015 jyly Astana qalasynda ashylǵan bolatyn. Mundaı júıeniń arqasynda sýpermarket klıenti Qazaqstannyń kez kelgen aımaǵyna taýaryn ózi jibere alady. Bundaı qyzmetti paıdalaný úshin klıent sálemdeni salýǵa arnalǵan, trek nómiri jazylǵan qorapshany satyp alýy kerek. Mundaı júıe sálemdemelerdi qabyldaý men jiberý merzimin azaıtýǵa, kásiporynnyń shyǵyn kólemin únemdeýge járdemdesýde.

---