InfoHub Logo

Maqsaty: «Mahabbat», «meıirimdilik», adamgershilik qundylyqtary týraly túsinikterin keńeıtý.

Mindetteri:
- ana men bala arasyndaǵy mahabbat týraly túsinik berý;
- analaryna degen súıispenshilik sezimderin arttyrý;
- anany súıýge, syılaýǵa tárbıeleý.
Kórneki quraldar: úntaspa, plakatqa salynǵan kúnniń sýreti, oqýlyq, dápter, úntaspalyq ánder jınaǵy.

Sabaqtyń barysy:
Shattyq sheńberi
Balalar sheńber quryp turady, sálemdesedi. Tárbıeshi búgingi sabaqtyń taqyrybymen tanystyrady.
- Bizdiń búgingi taqyrybymyz «Jaqsy kórý - jaqsy qasıet».
Jaqsy kórý - adamnyń adamdarǵa, tabıǵatqa, Otanǵa degen ystyq sezimi, mahabbaty, jaqsy is - áreketterge qyzyǵýshylyǵy.
Al osynyń bári Anany jaqsy kórýden bastalady. Óıtkeni bizge jaryq ómir syılaǵan ananyń aıaly alaqanyna, meıirimine teń keler nárse joq.
Balalar jaqsy kórýdi anadan úırenedi, anasyn jaqsy kórýden úırenedi.
Úntaspadan estilgen Á. Dúısenbıevtiń «Aq mamam»ánine balalar qosylyp aıtady.

• Anany nelikten eń jaqyn adam dep oılaısyńdar?
• Anadan qandaı jaqsy qasıetterdi alýǵa bolady?
• «Jaqsy kórýdi anadan úırenemiz» degendi qalaı túsinesińder?

Dáptermen jumys. Áńgimeleý.
Balanyń anaǵa degen mahabbatyn túsindirý maqsatynda áńgime aıtyp berý jáne ol boıynsha balalarǵa suraq qoıyp, jaýaptaryn tyńdaý.
Aýrýdan – aıaǵan kúshtirek
Ybyraı Altynsarın

Seıit jol ústinde júgirip bara jatqanda, bir arbaly kelip, ańdaýsyz soǵyp ketip, aıaǵyn zaqymdap alypty. Oıbaılap jylap jatqan balany kórip shoshynǵannan sheshesi esinen tanyp qalypty. Muny kórgen soń, Seıit jylamaq túgil, synǵan aıaǵyn ornyna salyp, tańyp jatqanda da dybysyn shyǵarmaı, qabaǵyn da shytpaı jatty. Sonda synyqshy kisi:
- Aıaǵyń aýyrmaı ma, qabaǵyńdy da shytpaısyń?- dep surady.
Seıit sheshesi shyǵyp ketken soń, demin alyp, synyqshyǵa sybyrlap aıtty:
- Aýyrmaq túgil, janym kózime kórinip tur, biraq meniń janymnyń qınalǵanyn kórse, apam da qınalyp, júdemesin dep, shydap jatyrmyn,- dedi.

• Seıittiń anasyn jaqsy kóretinin qaı áreketinen kórýge bolady?
• Sender de jaqsy kóretin adamdaryń úshin osyndaı shydamdylyq tanyta alǵan kezderiń boldy ma? Esterińe túsirip aıtyp berińder.

«Shyǵarmashylyq jumys»
Balalar aldyn ala daıyndalǵan qaǵazǵa kúnniń sýretin salady.
- Balalar, analaryń senderge kúndelikti qandaı jaqsy sózder aıtady?
- Sol sózderdi salǵan sýretterindegi kúnniń shýaǵyna jazyp kórsetińder.
Balalar kúnniń shýaǵyna «aınalaıyn», «kúnim», «janym», «altynym», «juldyzym», «qoshaqanym», «aıym», «botaqanym», «qulynym», «laǵym», «sáýlem», «qarashyǵym» t. b. sózderdi jazady.

Dáıeksóz
Alynǵan jaýaptar dáıeksózdiń túsindirilýimen bekitiledi.
Tárbıeshi taqtaǵa «Ómirdiń bar jaqsylyǵy jaqsy kórýden jaralǵan» halyq danalyǵy, dep jazyp qoıady.
- Jaqsy kórýdiń ózi adamnyń jaqsy qasıetin bildiredi.
Qoldan kelgenshe adamdardy, ómirdi, tabıǵatty, Otandy súıý kerek.
Óıtkeni jaqsy kóretin adamǵa, aınalańa eshýaqytta jamandyq oılamaısyń, olardy kerisinshe syılaısyń, olarǵa shydamdylyq tanytasyń, óıtkeni sen olardy jaqsy kóresiń. Ómirde barlyq adamdar bir - birin, aınalasyn, týǵan elin jaqsy kóretin bolsa, onda ómirde tek qana jaqsylyq bolady. Sebebi jaqsylyq jaqsy kórýden jasalady.

Dáptermen jumys
Dápterde berilgen sýrettegi bos torkózderge «Ana degen kim?» suraǵyna jaýaptar jazyńdar.
Balalar tapsyrmany óz dápterlerine qaryndashpen oryndaıdy.
Tapsyrma oryndalyp bolǵan soń jarıa etiledi, balalardyń oıy qorytyndylanady. Kútiletin jaýaptar: eń jaqyn adam, eń meıirimdi adam, eń aqyldy adam, qamqorshy, janashyr, dos, syrlas jáne t. b.

Júrekten - júrekke
Balalar ózderiniń sabaqtan alǵan áserleri men bilimderin óleń joldary arqyly bildiredi.
Balalar Tárbıeshige ilese myna óleń joldaryn qaıtalaıdy.

Qaıyrymdy jandar aınala,
Sheńberge kelsin jaılana.
Jalyqpastan qaıta biz,
Mahabbat sózin aıtamyz.
Súıemiz barlyq anany,
Júregim ottaı janady.
Baqyttymyz osy biz,
Qasymyzda dosymyz.