InfoHub Logo

Iskandırova Aıgerım Mýhanbedıakyzy

Qaraǵandy oblysynda ornalasqan keremet, kórkem Sátbaev qalasyn dáripteý. Kórkem jerleri, tarıhy jaıly aıta ketip, tanystyrý. Týǵan jerdiń qaı qazaq úshin orny erekshe ekeniń sezindire bilý.
Týǵan jer, qandaı keremet sóz deseńshi. Adamnyń qanyna sińip, bar boıyn baýrap alǵan, adamnyń jan dúnıesin alaı da dúleı qylǵan týǵan jerge degen qudiretti kúshti aıtsańshy. Týyp ósken ólkeńniń jeri qatty bolsa, ol sen úshin jumsaq bolyp kórinedi. Týǵan jerińniń jelpip ótken samaly betińdi osyp ótse de, ol sen úshin betińdi aıalap, sıpalap ótkendeı seziledi. Týǵan jerińniń shópteri tikendi, aıaqty qantalatatyndaı bolsa da, ol sen úshin mamyq, jumsaq bolyp seziledi. Týǵan jerińniń tabıǵaty qatal bolsa da ol sen úshin meıirimge toly bolyp kórinedi. Týǵan eldeı el bolmas, týǵan jerdeı jer bolmas dep osyny aıtady.

Meniń týyp ósken, kindik qanym tamǵan jerim Sátbaev qalasy. Keıbir adamdarǵa bul qala kishigirim bolyp kórinse, ol men úshin dardaı qala ispettes. Bul qalaǵa ataqty ári tuńǵysh akademık Qanysh Imantaıuly Sátbaevtyń aty berilgen. Osyndaı ataqty álemge belgili tulǵanyń esimi berilgenine men qýanamyn. «Árkimniń týǵan jeri - Mysyr shahary», - deıdi halyq naqyly. Ony qalaı dáripteseń de artyqtyq etpeıdi degenge keledi bul sóz. Endeshe týǵan qalamyz jaıly qalaısha aýyz toltyryp aıtpasqa.

Ótkenińdi taný, tarıhyńdy bilý qasterli mindet. Árıne, bul aıtýǵa ǵana ońaı. Keshe qandaı boldyq negizimiz qalaı qalyptasqan edi? Osyny árbir es jıǵan azamat bilýi tıis.
Sátbaev qalasynyń tarıhy qoınaýynda mol baılyq jatyr desek qatelespespiz. Onyń tarıhy Jezqazǵan - Qarsaqbaı - Ulytaý eldi mekenderimen tyǵyz baılanysty. Sátbaev Qalasynyń terıtorıasy 1932 jylǵa deıin Aqmola men Semeı oblystarynyń quzyrynda boldy, keıinnen Qyzylorda men Shymkent oblystarynyń, al 1936 jyldyń 29 maýsymynan bastap Qaraǵandy oblysynyń quramyna endi. 1926 jyly qurylǵan Qarsaqbaı aýdany men oǵan baǵynyshty bolǵan Jezqazǵan rýdnıgi Ońtústik Qazaqstan quramynan tolyqtaı Qaraǵandy oblysyna kóshti.
1954 jyly Jezqazǵan – Rýdnık poselkesinen 7 km jerdegi jazyq dalada kenshiler kentiniń qurylysy bastaldy. 1956 jyly salynyp jatqan jańa kent, Nıkolskıı jumysshylar kenti atalyp, al kelesi jyly ol Búkilodaqtyq komsomoldyq qurylys bolyp jarıalandy.
1973 jyldyń aıaǵynda Qazaq SSR Joǵarǵy Keńesi Prezıdıýmynyń jarlyǵymen quramynda Rýdnık jáne Severnyı poselkeleri bar Nıkolskıı kentine qala mártebesi berildi.