Oıýyn oıyp,
Oryndap qoıyp,
Túr salǵandaı órnekke,
Qıynnan qıyp,
Qıyrdan jıyp,
Qurap, sózdi termekke,
Eńbekke egiz til men jaq,
Erinbeseń, sóılep baq!
Imenip kópten,
Saqtyq qyp eppen,
Tasalama oıyńdy!
Ashynsa etiń,
Ashylmaq betiń,
Tiri kómbeı boıyńdy,
Júregińniń jarasyn
Kórset jurtqa!
Qarasyn.
Oqýshym, uqpaı,
Osqyryp shyqpaı,
Sabyrmen baıqa sózimdi!
Shyqqan soń syrtqa,
Jaıǵan soń jurtqa,
Sóz tergeýge tózimdi.
Kóp maǵyna, az láfúz,
Esek baspas taıǵaq muz.
Qarqyldar qarǵa,
Shıqyldar arba,
Boı súısiner sazy joq.
Sheshensip jurtqa,
Myljyńdar qyrtpa,
Oı ısiner sózi joq.
Maǵan úlgi ol emes,
Ol túserlik jol emes.
Joldar bar ózge,
Joba bar sózge
Júrekke dóp, oıǵa jon.
Jamandy jaman
Demekpin haman,
Meıliń týla, meıliń kón.
Ilanbasam, aıtpaımyn,
Imanymnan qaıtpaımyn.
Ár joldy oılap,
Oıyma boılap,
Uqtym taıyz, tereńdi.
Saıraǵan tilmen,
Zarlaǵan únmen
Qulaǵy joq kereńdi
Uqtyra almaı sóz áýre,
Tek tura almaı biz áýre.
Qaraımyn keıin:
Orysqa sheıin
Han baǵypty qazaqty.
Baǵa almaı jóndep,
Basqaǵa ken dep,
Artqan jurtqa azapty.
Bas adamdar halyqty
Satyp, syılar alypty.
Kelgen soń beri,
Keıingileri
Boldy qumar shekpenge -
Ógizdeı órge,
Ótkelsiz jerge
Kúnde aıdap jekkenge.
Bir kún toısa esekter,
Mı joq aldyn esepter.
Salynyp daýǵa,
Satylyp jaýǵa,
Bolystyqty alysty.
Qazyq bop jurtqa,
Qorǵan bop syrtqa,
Kim oılady namysty?!
Maqtady ulyq, boldy máz,
Qaýym úshin qaıǵy az.
Oqytty jasyn,
Óstirtip shashyn,
Mal tabýǵa salyndy.
Qalamnan, hattan,
Jaýaptan aıtqan
Bildi jalǵyz alymdy.
Keıbiri shen almaq ta,
Dinin shanshyp qarmaqqa.
Basynda sállá,
Aýzynda Alla,
Moldalarda ne ǵamal?
Kózderin súzip,
Júzderin buzyp,
Aldap jurtty, jımaq mal.
Ujmaq molda qolynda,
Saýda-sattyq jolynda.
«Bergenge - ujmaq,
Bermese - dozaq», -
Dep úıreter halyqqa.
Ujmaqtyń kiltin,
Allanyń múlkin
Arendaǵa alyp pa?
Molda satsa tıynǵa,
Ol - Alla emes, syıynba!
Shalqańnan jatyp,
Alllany satyp,
Alamyn dep qorlama!
Eńbeksiz ıt jer,
Beınetsiz bıt jer,
Berseńder, ber moldaǵa!
Ózińdi biraq aldama,
Aqshaǵa ujmaq jaldama!
Ulǵaıyp qaıǵy,
Ýytyn jaıdy,
Aıtpasyma bolmady.
Qabaǵyn túıip,
Qaharyn jıyp,
Jan-jaqty bult torlady.
Jańbyr jaýmaı, jaýsa qar,
Jurt jutaıtyn túri bar.
Balalyq qalyp,
Es bilip anyq,
Er jetkeli jıyrma jyl.
Baıaǵy qalpy,
Baıaǵy salty,
Bul netken jurt uıqyshyl?
Bolsyn kedeı, bolsyn baı,
Jatyr beıqam, jym-jyrt, jaı.
Emshegin emip,
Anaǵa senip,
Bala uıyqtaıdy jastyqpen.
Qymyzǵa qanyp,
Qyzaryp janyp,
Baı uıyqtaıdy mastyqpen.
Shalap ishken kedeı mas,
Myna jurttyń túri ońbas!
Uıqyshyl jurtty
Túksıgen murtty
Obyr obyp, soryp tur.
Tún etip kúnin,
Kórsetpeı minin,
Oıatqyzbaı qoryp tur.
Obyr bolsa qamqoryń,
Qaınaǵany sol soryń!
Oıanǵan erge
Umtylǵan jerde
Erýshi az, serik kem.
Qas bilgen dosty,
Dos bilgen qasty,
Mundaı eldi kórip pe eń?
Qys ishinde birer qaz
Kelgenmenen, qaıda jaz?!
Qazaǵym, elim,
Qaıqaıyp beliń,
Synýǵa tur taıanyp.
Talaýda malyń,
Qamaýda janyń,
Ash kózińdi, oıanyp.
Qanǵan joq pa áli uıqyń,
Uıyqtaıtyn bar ne sıqyń?!

---