InfoHub Logo

Esimde... Qarasha aıynyń 8-shi juldyzy, jo-joq juldyzdy kún emes men úshin...qarashanyń qara sýyq jelindeı yzǵarly. 
Tań. Kúzgi qara sýyqtan meni anamnyń qushaǵy ǵana qutqaratyn. Táp-tátti uıqyda jatyrmyn. Anamnyń jyp-jyly qushaǵynda. Sol bir jylýlyq pen tátti uıqyny sýyt habar buzǵandaı.

Ákemniń o dúnıelik bolǵany týraly... Nebári 5 jasta bolsam da bárin túsinip jatyrmyn. Bárin tús sekildi qabyldadym ba, bala kóńil esh nárseni alańdar emes. Sabyrly qalpymdy buzbastan  múmkin ótirik shyǵar, tús kórip jatqan bolarmyn degen úmitpen tysqa shyqtym. Ústimde anam kıgizgen qyzyl kóılek (áli esimde). Rasymen de, jańa ǵana múlgigen tynyshtyq buzylǵan.
Úıge aıańdap qaıta kirdim, kirdim de anamdy izdeı bastadym. Kishkene ǵana peshtiń janynda anam otyr eken. Janaryndaǵy jasty baıqamaý múmkin emes edi.

- Mama jylamashy...

- Jylamaımyn qyzym...

Bitti... Ári qaraı aramyzda dıalog boldy ma, bolmady ma bilmeımin... Esimde qalǵany meni kórshi úıge aparyp tastaǵany ǵana... Balamyn ǵoı, ol oqıǵaǵa múlde senbedim be, senýge qoryqtym ba, áıteýir kózime jas almappyn... Álde ashshy aqıqatqa sengim kelmedi me eken? Bilmeımin... Tym aýyr jaǵdaı. 

Qazir 20 jastamyn, ákemniń taǵdyr talaıynan erte ótkenine mine 15 jyl ótipti...

Ákem meniń-báıteregim! 15 jyl buryn sol báıterek qulaǵan bolsa, onyń tamyry ólgen joq. Betegeli báıterek ónip, onyń butaqtary qaıta qanat jaıyp kógerdi. Men ózimdi elsiz jerde ósip turǵan qyzǵaldaqqa teńemeımin, men alyp báıterekke uıa salǵan qarlyǵashpyn.
Áıtse de, biz óz báıteregimizdi ańsaımyz...saǵynamyz. Ákege degen saǵynysh júzimizden bilinbese de júregimiz qanjylap, "Ákem bolǵanda..." degen oı sanada jańǵyryp turady.

Ákesiz ótken ár mınýt, saǵat ǵasyrǵa tatıtyndaı aýyr, óte aýyr... Muń. Qaıǵy. Saǵynysh. Ár sátim saǵynyshpen aýyrlap turady. Shirkin, kóp nárse jazǵym keledi-aý, kóp nárse... Tom-tom kitap jazsam da syıdyra almasymdy bilemin. Bári oıymda!  Ákemniń suńǵaq boıly, keń jaýyryndy beınesi ǵana kóz aldymda qalyp qoıypty...

Meniń bir ǵana bilerim, meniń ákem eń jaqsy adam...bolǵan!

---