InfoHub Logo

Erteden kele jatqan «Kórshi aqysy — Qudaı aqysy» degen sóz bar. Bul sózdiń shyǵý tórkini ańyzymen aqıqaty ilese kelip bylaı baıandalady.

Muhammed aleıhıssalam mıǵrajda bir beıbaqtyń ekinshi bir kisige jabysyp, sońynan qalmaı júrgenin kóredi. Ol qaıda barsa da, «Haqymdy ber», — dep, qasynan bir eli ajyramaıdy.

— Áı, bul adamda ne aqyń bar? Ne istedi saǵan? — dep suraıdy.

— Bul kiside meniń alynbaǵan aqym bar.

— Qandaı aqy?

— Bul meniń kórshim edi. Allahý ta’ala oǵan baılyq berdi. Aýlasynan únemi aýqatty adamdar arylmaıtyn. Al men óte kedeı, paqyr boldym. Keıde onyń esigine syǵalap telmirip turatynmyn. Ol maǵan kóziniń qıyǵyn da salmaıtyn. Bala-shaǵam ash jatty. Bir tatym nanǵa zar boldym. Allahý ta’ala dáýletti bir basyna úıip-tógip bergende ishine kedeı-kepshiktiń de nesibesin bergen edi. Bul baılyǵyn qajetisiz jerge shashty. Qıamette ekeýmiz qatar kelip, Allah bergen sol haqymdy surap júrmin, — deıdi.

Paıǵambarymyz aleıhıssalam sol baıǵa qarasa, músápir kúıge túsken eken. Kórshisine qaraýǵa beti shydamaı, qaraıyp ketipti. Paıǵambarymyz aleıhıssalam:

— «Kórshi aqysy — Qudaı aqysy». Kórshisine qaraılaspaǵan, halin suramaǵan adam meniń úmmetimnen emes, — deıdi.

Paıǵambarymyzdyń bul sózi dúıim úmmetke taralyp, keıingilerge úlgi-ónege bolypty. «Kórshiniń aqysy» degen uǵym osy kezden bastap dástúrge de engen eken.

---