InfoHub Logo

Zulqarnaın aleıhıssalam áskerimen jolda kele jatyp «aıaqtaryńa ilingen nárselerdi jınaı júrińder» dep ámir beredi.

Áskeri bul ámirdi estigen kezde ishterinen bir bóligi «Kóp júrdik qatty sharshadyq. Tún ishindemiz, oǵan qosa aıaǵymyzǵa ilingen nárselerdi jınap bosqa qınalamyz ba, eshnárse jınamaımyz» degen sheshimge kelip, eshnárse jınamaıdy.

Ekinshi bóligi «Qolbasshymyz buıyrǵan eken, ámirine baǵynaıyq az ǵana bolsa da jınaıyq. Óıtkeni Qolbasshyǵa qashanda moıynsuný kerek» dep az ǵana jınaıdy.

Úshinshi top bolsa «Qolbasshymyz eshnárseni bosqa ámir etpeıdi. Mindetti túrde bir nárseni bilip aıtqan bolý kerek, ámirin oryndaımyz» dep búkil qaptaryn betine deıin toltyrady.

Tań atqan kezde búkil ásker túnde altyn qoınaýynan ótkenderin túsinedi. Aıaqtaryna tıgen nárselerdiń altyn ekenin eshkim ańǵarmaǵan bolady. Sonda ámirdi tyńdamaı esh nárse almaǵan birinshi top:

— Qap nege almadyq! Nege tyńdamadyq qolbasshymyzdyń sózin. Eń bolmaǵanda bireýin alǵanymyzda... dep ókinip qalady.

Ekinshi top bolsa óz-ózderin sóge bastaıdy:

— Qap biraz taǵy alýymyz kerek edi. Qaltalarymyzdy, qaptarymyzdy aýzyna deıin toltyryp alýymyz kerek edi...

Úshinshi top ta ókinip:

— Kereksiz, paıdasyz zattarymyzdy tastaǵanda budan da kóp jınaıtyn edik...

Mine osy mysalda bolǵany sekildi, ahırette búkil adamdar da ókinedi. Kápir adam:

— Nege ıman etpedim. Sengenimde eń bolmasa tozaqqa tússem de, ımanymnyń arqasynda sońynda báribir jánnatqa kirer edim. Máńgilik tozaqtan qutylar edim, — deıdi.

Musylman bolsa da saýaby az kisi:

— Budan da kóp saýapty ister jasaýym kerek edi. Budan da kóp nıǵmetke qaýyshar edim, — deıdi.

Musylman bolyp, saýaby kóp bolǵan kisi bolsa:

— Qap, budan da úlken dárejelerge kóteretin kóbirek ǵıbadat jasaýym kerek edi, kóbirek sadaqa berip, kóbirek oraza tutyp, kóbirek saýap jınaıtyn amaldar jasaýym kerek edi... dep ókinedi.

---