InfoHub Logo

Asanova Lázzat Altynaıqyzy (27.07.70, Almaty oblysy Panfılov aýdany Aqjazyq aýyly — 25.12.86, Almaty) — Jeltoqsan kóterilisiniń qurbany. 1985 jyly Almaty qalasyna kelip, P. Chaıkovskıı atyndaǵy mýzykalyq ýchılıshege oqýǵa túsedi. 1986 jyly 16-18 jeltoqsan kúnderi bolǵan qazaq jastarynyń otarshyldyq jáne ámirshildik júıege qarsy kóterilisine qatysady. Ol Ortalyqtyń bılep-tósteýshiligine narazylyq bildirip, qaladaǵy Jańa Alańǵa (qazirgi Respýblıka alańy) alǵashqy ereýilshiler qatarynda «Qazaqtar! Kiriptarlyq quldyqta ómir súrgenimiz jetedi! Biz elimizdiń táýelsizdigin jeńip alǵan kezde ǵana azat bola alamyz!» degen uranǵa qosylyp shyǵady. Kóterilis qatygezdikpen janyshtalǵannan keıin basqa da ustalǵan 87 adam qatarynda Asanovaǵa aıyp taǵylyp, qamaýǵa alynady.

1986 jylǵy 16-18 jeltoqsanda Almaty qalasynda bolǵan oqıǵalarǵa túpkilikti baǵa berý jóninde respýblıka Joǵarǵy Keńesiniń Tóralqasy qurǵan komısıa múshesi F. Ignatovtyń málimetterine qaraǵanda, Lázzattyń máıiti birneshe kúnnen keıin mýzykalyq ýchılıshe jataqhanasynan tabylǵanda, ol týraly «jataqhananyń besinshi qabatynan qulap ólgen» degen qaýeset taratylǵan. Degenmen, Asanovanyń denesin týǵan aýylyna deıin İshki ister mınıstrligi men Memlekettik qaýipsizdik komıtetiniń qyzmetkerleri arnaıy qaraýylmen aparǵan. Osyǵan qaraǵanda, ol jazalaýshylar qolynan qaza tapqan. Qazaqstan táýelsizdik alǵannan soń ǵana Asanova jónindegi shyndyq qalpyna keltirile bastady. Lázzattyń erligine arnalǵan án («Qaharman qyz — Lázzat qyz». Mýzykasy — J. Tursynbaevtiki, óleńi — A. Asylbektiki) jaryq kórdi.

---