Ókinish qyp ótken menen ketkenge,
Ótinemin, maǵan, qurbym, kektenbe.
Alaı-túleı qarly daýyl soqpaı ma?
Alasapyran eń alǵashqy kóktemde.
Sony esińe al, maǵan, qurbym, kektenbe.
Ashýyńdy alaıyn men teń bólip,
Ótinemin, ótkinshige berme erik?!
Sen de aıypty, men de aıypty emespin,
Sende de bar, mende de bar pendelik.
Sende de bar, mende de bar alalyq,
Sol alalyq órshimesin jańaryp!
Alalyqty aıbalta ǵyp ustaǵan,
Bul ómirde ázázildiń bary anyq!
El men eldi, halyq penen halyqty
Jaýlastyrǵan, sol ázázil qaýipti.
Kúndestik dep atalatyn bir mystan
Kúlge aýnapty...
Ázázildi taýypty.
Ótinemin, qurbym, maǵan kektenbe,
Ókpeleı ber, nazdana ber, jek kórme!

---