Mańdaıda bir tal shashym aǵarypty,
Belgisi bolǵaı-daǵy «danalyqtyń».
Yǵysyp, qaraqusqa bara jatyr,
Kekili keshegi anaý balalyqtyń.
Aǵarsyn shashym, meıli, aǵarmasyn,
Alań bop aýyrmaǵaı oǵan basym.
Jastyqtyń oty sóner, oty sóner,
Qyzýy boıda biraq joǵalmasyn.
Janar taýym bar edi ǵoı keýdemde,
Jalyn atyp, jana-jana sóngen be?!
Tas qaınatyp, jatýshy edi, ot búrkip,
Tastaı qatyp, tynǵan ba endi, ólgen be?
Bir janar taý jatýshy edi tósimde,
Jana-jana aınalǵan ba óshýge?1
Qyzyl-kúreń alaý ottyń ornynda,
Qylymsyǵan qyz-saǵymdar kóshýde.
Janar taýym bar edi ǵoı órtengen,
Jalyny onyń nege munsha erte ólgen?!
...Otyryp ap sóngen oshaq basynda,
Qorqyt atam qyl qobyzyn shertem men.

---