InfoHub Logo

Isataı — baısaldy, uqypty, ári iste tyńǵylyqty jigit. Ol qaı jaǵynan bolsyn, ózine teń adam alyp, otbasyn qurýdy maqsat etti. Oılaǵany boldy. Birsypyra ýaqyt el-eldi aralap júrip, ózi súıgen bir jas áıelge úılendi.

Súıisip qosylǵan eki jas sharýashylyq qurastyra bildi, az ýaqytta baısaldy sharýalardyń qataryna qosyldy. Isataı syrttan qurastyrsa, onyń jas jary Aqsaýsaq úıdiń ishki turmysyn kelisimdi ustap otyrdy.

Tórdegi júkti, jerdegi tósenishti, tósek oryn men kıim-keshekti jınastyryp, tártipti ustaýǵa sonshalyqty uqypty bolsa da, Aqsaýsaq qazan-oshaqpen, ydystarmen aınalysýǵa jas shaǵynan-aq ıkemsizdeý bolatyn. Jeke úı bolsa da, sol ádeti ózgermedi, súırikteı appaq saýsaǵyn aıaq-tabaqqa malyp, kirli saýsaq bola almady. Solaı bola tursa da, nelikten ekeni belgisiz, ol úıdiń ydystary únemi tap-taza bolyp turdy.
Bul qupıanyń syry keıinirek ashyldy. Malǵa, úıge abaı bolsyn dep Isataı bir kúshik asyrap ósirgen, ony Maılaıaq (maıly aıaq) dep ataǵan bolatyn. Maılaıaq ıesi oılaǵandaı senimdi kúzetshi boldy: mal qorasyna, úı mańyna beseýbet adamdardy jolatpady. It bolsa da senimdi serik bolǵan Maılaıaqqa kúndiz de, túnde de úıdiń esikteri ashyq turdy. Aqsaýsaq oǵan arnaýly as bergen joq, bos turǵan qazandaǵy qaldyqtar men aıaq-tabaqtaǵy sarqyndardy iship-jep, jalap, toıynyp júre berdi, tipti túgin tartsa, maıy shyǵatyndaı bolyp semirip aldy.

Sol Maılaıaq kenet aýyryp, óldi. Aıaq-tabaq jýylyp, súrtilmedi. Soǵan nalyǵan Aqsaýsaq: «Maılaıaq ketti de, osy úıden tazalyq ketti», — depti.

 

---