InfoHub Logo

Jastar bas qosyp, ózara oınap-kúlip otyr edi. Kenet, Sútemgen olardyń oıynyn bólip jiberedi, óz ákesiniń tamasha bir qımylyn aıtty:

— Qys mezgili. Qazaqsha qańtar, aqpan aılarynyń biri bolý kerek, tań sáriden burqaǵan boran tús aýa basylyp, kún shaıda ashylypty, — dep bastady ol áńgimesin. — Bul kezde ákem jylqylaryn jýsatyp, ózi qalyń taldyń yqtasynynda, at ústinde tur eken. Qulaǵyna bir syldyr estiledi, burylyp qaraıdy. Tańqalarlyq tamasha, bir qoıan birneshe quryq súırep kele jatyr. Ákem álýetti, qandaı jaǵdaıda bolsa da, batyl
qımyldaıtyn adam ǵoı. Dereý quryǵyn jazyp jiberip, qoıannyń moınyna tastaı beredi. Qoıan kidirmeıdi, súıreı jóneledi. Mingeni atamnyń kók aıǵyry eken, janýar qandaı beldi, qoıannyń kúshti tegeýrinine tótep beredi.

Kórmegen adamdarǵa bul bolmaǵan bolýǵa da tıis emes oqıǵa sıaqty. Degenmen, buǵan senýge tıistimiz. Óıtkeni ákem ótirik aıtpaıdy, aıtyp ta kórgen emes. Qoıannyń súırep kele jatqany segiz quryq eken, ákemniń quryǵy toǵyzynshy bolypty. Qoıandy tabanda óltirmeı, moınyndaǵy toǵyz quryqpen aýylǵa alyp kelipti.

Muny tyńdap otyrǵan jastar ótirik derin de, shyn derin de bile almaı, tek áńgimeniń qyzyǵyna uıyp, artyn kúlkige aınaldyrady.

Budan keıin Sútemgen ózi ishinde bolǵan bir tamashany aıtty.

— Kishi besin kezi edi. Balakól jaǵynan kele jatyp Tólesh adyryna shyǵa keldim. Etektegi túbek ishinde birneshe adam ersili-qarsyly júgirip júr. Mine, tamasha! — dep ol otyrǵandarǵa jaǵalaı qarady. — Sol jerdegi ótkelden ótip, túbekke kirdim. Bes-alty adam terlep-tepship, entigip otyr. Bári de tanys: Begen aýylynyń pishenshileri eken. Jaqsy keldiń dep shurqyrasa qaldy. Bular jumys istep júrgen kezde kenet bir qus kóredi. Soǵan qyzyǵady da, jumysty tastap, jabyla qýady. Sáskede qýǵan qusty kún uıasyna qonar aldynda ǵana soǵyp alady. Bul qolǵa sırek túsetin qus — kádimgi uzyn sıraq shil.

Asyǵys jumysym joq, atymdy otqa jiberdim de, qosqa kirdim. Bárimiz otyra qaldyq ta, shildiń júnin juldyq. Qudaı biledi dep aıtaıyn-aý, qolymdy kere jaıyp qushaqtap, tórt ret shyǵardym, sonda da qosta birsypyra jún qaldy...

— Shildiń etin asýǵa kiristik, — dep sózin odan ári jalǵastyrdy Sútemgen. — Erneýi on tórt qarys qazanǵa eki jiligi áreń sıdy. Sylqıa toıyp jattyq. Tańǵa taıaǵanda oıandym. Qatty shóldeppin. Qosta sý joq, Esilge barýǵa erindim. Túndegi ettiń sýyq sorpasyn ishkim keldi. Betine maıy qatyp qalypty, ojaýmen ony buza almadym. Senderge ótirik, maǵan shyn. Olda, belda, bir ótirigi joq, qatqan maıdy baltamen buzyp, sýyq sorpaǵa qandym.

Otyrǵandar qyzyqqa ábden batty, ishek-silesi qata kúlip, sergip qaldy.

---